Раёсати иттилоот ва робита бо ҷомеаи Вазорати мудофиаи Ҷумҳурии Тоҷикистон аз роҳбарияти мақомоти иҷроияи ҳокимияти давлатии шаҳру ноҳияҳо, вазорату идора, кумита, ташкилоту муассиса ва дигар истифодабарандагони сомонаҳои расмӣ ва шабакаҳои иҷтимоӣ, махсусан шабакаи “Фейсбук” эҳтиромона хоҳиш менамояд, ки ҳангоми бо истифода аз “зеҳни сунъӣ” сохтани расм ва дигар шиорҳои таблиғотии хоси соҳаи низомӣ, ба талаботҳои ҳатмии ҳарбӣ аҳамияти ҷиддӣ зоҳир намоянд.
Вақтҳои охир дар шабакаҳои интернетӣ, аз ҷумла “Фейсбук” аксҳои сарбозону афсарони қисму воҳидҳои ҷузъу томи Қувваҳои Мусаллаҳи кишвар дар шаклҳои гуногун, ғайриоинномавӣ дизайнерӣ шуда, пешниҳоди ҷомеа мегарданд, ки ин бар хилофи талаботҳои оинномаҳои Қувваҳои Мусаллаҳи кишвар аст.
Либоси низомиёни кишвар вобаста ба сохтор ва навъи қӯшунҳо мушаххасан муайян гардидааст ва дар онҳо рамзҳои давлатӣ, аз ҷумла Парчам, Нишон ва рамзҳои худи ҳамон сохтор ҷой дода шудааст, ки ин дар дохили кишвар нишонаи эҳтиром ба муқаддасоти миллӣ, ҳисси баланди ватандӯстӣ ва шаъну шараф буда, дар арсаи байналмилалӣ бошад, муаррифгари Қувваҳои Мусаллаҳи Ҷумҳурии Тоҷикистон ба шумор мераванд.
Бинобар ин, аз масъулин талаб карда мешавад, ки чунин аксҳои таблиғотӣ дар мувофиқа ва бо розигии сохторҳои дахлдор таҳия ва пешкаш карда шавад.
