17 феврал бо ташаббуси кафедраи ҳарбии Донишгоҳи миллии Тоҷикистон дар толори асосии донишгоҳи мазкур ба муносибати 33-солагии таъсисёбии Қувваҳои Мусаллаҳи Ҷумҳурии Тоҷикистон ҳамоиши тантанавӣ баргузор гардид. Дар чорабинии ҷашнӣ сардори Ситоди генералии Қувваҳои Мусаллаҳ–муовини якуми вазири мудофиа, генерал-лейтенант Саидзода Бобоҷон, ректори Донишгоҳи миллии Тоҷикистон, профессор Насриддинзода Эмомалӣ, ҳайати афсарони кафедраи ҳарбӣ ва устодону донишҷӯёни донишгоҳ иштирок доштанд.
Чорабинӣ бо садо додани Суруди миллӣ оғоз гардида, бо сухани ифтитоҳии роҳбарияти донишгоҳ идома ёфт. Профессор Насриддинзода Эмомалӣ ҳайати меҳмонон ва иштирокчиёни ҳамоиши тантанавиро ба муносибати 33–солагии Артиши миллӣ табрик намуда, аз саҳми назарраси Қувваҳои Мусаллаҳи ҷумҳурӣ ҳамчун сипари боэътимод дар таъмини мудофиаи давлат, ҳифзи сарҳади давлатӣ ва марзу буми аҷдодӣ хотиррасон шуд.
Дар баромади худ сардори Ситоди генералии Қувваҳои Мусаллаҳ–муовини якуми вазири мудофиа, генерал-лейтенант Саидзода Бобоҷон аз таваҷҷуҳу ғамхориҳои пайвастаи роҳбарияти олии мамлакат, хосатан Сарфармондеҳи Олии Қувваҳои Мусаллаҳ, генерали Артиш муҳтарам Эмомалӣ Раҳмон ёдоварӣ намуда, таъкид кард, ки ҷавонон бо рӯҳияи ватандӯстонаву садоқатмандона, бо ҳама гуна амалу рафтори нек дар ободиву пешрафти Ватани азизамон бояд саҳмгузор бошанд. Дар ин росто зикр карда шуд, ки тайи солҳои ахир теъдоди ҷавонони ватандӯсте, ки ихтиёран ба сафи Қувваҳои Мусаллаҳ мепайванданд, зиёд шуда истодааст. Имрӯз хизмат дар сафи Қувваҳои Мусаллаҳ барои ҳар як ҷавони бонангу номус мактаби далериву ҷасорат, мардонгиву садоқат ва макони обутоби маънавию ҷисмонӣ аст.
Дар фарҷом аз ҷониби Вазорати мудофиаи мамлакат як қатор афсарони Кафедраи ҳарбии Донишгоҳи миллии Тоҷикистон ва устодоне, ки дар таълиму тарбияи насли ҷавон ҳиссаи арзанда доранд, бо рутбаҳои навбатии эҳтиётии ҳарбӣ, мелалҳои ҷашнии “30–солагии Қувваҳои Мусаллаҳи Ҷумҳурии Тоҷикистон” ва Ифтихорномаи вазири мудофиаи Ҷумҳурии Тоҷикистон сарфароз гардиданд.
