Дар майдони сафороии яке аз марказҳои таълимии Қӯшунҳои хушкигарди Қувваҳои Мусаллаҳ дар гарнизони Душанбе наздик ба 200 нафар наваскарон саф кашида буданд, то ки дар назди ҳамхизматон ва падару модари хеш Савганди ҳарбӣ ёд намуда, минбаъд ба ҳайси сарбозони комилҳуқуқи Артиши миллӣ тамоми вазифаву ӯҳдадориҳои ҳарбиву хизматии худро мустақилона иҷро намоянд.
Маросими савгандёдкунии онҳо дар асоси муқаррароти Ойинномаи сафороии Қувваҳои Мусаллаҳи мамлакат бо даровардани Байрақи ҷангӣ ва садо додани Суруди миллӣ оғоз гардид.
Зимнан, ҳар як наваскар дар назди масъулини роҳбарикунандаи навъи қӯшуни хеш, афсарони қисми ҳарбӣ ва падару модарон савганд ёд намуда, қавл доданд, ки сарбози содиқу бошарафи Ватан боқӣ монда, натанҳо давоми хизмат, балки тамоми умр баҳри таъмини суботу амнияти кишвар кӯшиш мекунад. Зеро ҳифзу ҳимояи давлат ва таъмини амнияти мардум ҳамеша вазифаи шаҳрванд, хусусан ҷавонони бонангу ор ва муҳофизони он мебошад. Ин ҷавонон низ маҳз бо дарки ҳамин рисолати фарзандӣ имрӯз хизмати ҳарбӣ ва масъулияти дифо аз марзу буми ватанро пеша намуданд.
Наваскарон садоқату самимияти худро зери Байрақи ҷангии қисми ҳарбӣ бо баёни ибораи басо ҳам пурифтихори хизмати содиқона ба халқу Ватан нишон дода, изҳор доштанд, ки дар ин роҳи пуршараф ва мояи ифтихору сарфарозӣ қадамҳои устувор мегузоранд ва хизмати масъулиятноки низомиро сарбаландона пеш мебаранд.
Ҳайати роҳбарикунандаи қисми низомӣ, намояндагони бахшу соҳаҳои гуногуни ҷомеа ва волидону наздикони сарбозон, ин гурӯҳи фарзандони далеру қаҳрамони Ватанро ба муносибати қабули Савганди ҳарбӣ самимона табрику муборакбод намуда, таъкид доштанд, ки маҳз бо шарофати садоқату ҷасорати касбӣ, фидокориву ҷонисорӣ ва хизматҳои шабонарӯзии хизматчиёни ҳарбӣ дар сарзамини поки ниёгонамон сулҳу суббот пойдор аст ва имрӯз ҷомеаи кишвар зиндагии осоишта доранд.
Ҳамин тавр, ҷамъомади тантанавии қабули Савганди ҳарбӣ аз ҷониби гурӯҳи наваскарони даъвати баҳории соли равон дар ин қисми низомии Вазорати мудофиа бо гузашти низомии ҳайати шахсӣ ва таҳти навои оҳангу таронаҳои аҳли ҳунар ба поён расид.
Б. ШАРИФОВ
