Ҷамъомади тантанавӣ ба муносибати Рӯзи Конститутсияи Ҷумҳурии Тоҷикистон дар Вазорати мудофиаи мамлакат бо даровардани Парчами давлатӣ, Байрақи ҷангӣ ва бо садо додани Суруди миллӣ аз ҷониби иштирокчиёни ҷамъомад оғоз гардид.
Дар ин ҷамъомад, ки ҳайати шахсии Дастгоҳи марказии Вазорат ва Ситоди генералии Қувваҳои Мусаллаҳ иштирок доштанд, масъулини Вазорати Мудофиа ва намояндаи Академияи миллии илмҳои Тоҷикистон зимни суханронӣ, нақши ин санади муқаддаси таърихӣ ва сарнавиштсозро дар таърихи давлатидории навини тоҷикон муҳиму зарурӣ арзёбӣ карданд
Дар идомаи чорабинӣ зикр карда шуд, ки дар баробари соҳибистиқлол гардидани кишвар ва қабули Конститусия, ҷомеа ва давлати Тоҷикистон ба марҳилаи сифатан нави таърихи инкишоф ворид гардида, дар ҳама соҳаҳои ҳаёти ҷомеа дигаргуниҳои куллӣ ба миён омад. Дар Конститутсияи Ҷумҳурии Тоҷикистон халқ баёнгари соҳибихтиёрӣ ва сарчашмаи ягонаи ҳокимияти давлатӣ эълон гардида, раъйпурсии умумихалқӣ ва интихобот ҳамчун ифодаи олии бевоситаи ҳокимияти халқ эътироф шудааст.
Дар конфренсияи ҷумҳуриявии илмӣ — назариявӣ, ки дар Кохи афсарони Вазорати Мудофиа бо иштироки масъулини вазорат ва олимону коршиносон доир гардид, аз ҷониби иштирокчиён дар робита ба мавзӯи “Конститутсия-заминаи ҳуқуқии Қувваҳои Мусаллаҳ” маърузаҳои гуногун пешниҳод ва мавриди таҳлилу баррасӣ қарор гирифт.
Аз ҷумла қайд карда шуд, ки таҳияи қонуну санадҳои меъёри — ҳуқуқӣ доир ба фаъолияти хизматчиёни ҳарбии Қувваҳои Мусаллаҳ низ дар асоси меъёрҳои Конститутсия ба роҳ монда шуда, пеш аз ҳама моддаи 43-юми ин санади олии ҳуқуқӣ, фаъолияти рўзмарраи хизматчиёни ҳарбиро муайяну мушшахас намудааст. Вобаста ба ин хизматчиёни ҳарбиро мебояд барои фаъолияти пурсаммар ҷиҳати таҳкими истиқлолияти давлатӣ, амният ва иқтидори мудофиавиии он садоқатмандона хизмат намуда, баҳри дар доираи қонун ба роҳ мондани фаъолияти хамешагии хеш ҷаҳду талош намоянд.
Дар идомаи конфронс афзалияти дигари Конститутсияи Ҷумҳурии Тоҷикистон хусусияти миллӣ доштани он дониста шуд, ки ба андешаи ҳозирин дар ин ҳуҷҷати муҳим ормони мардуми тоҷик, суннатҳои таърихии давлатдорӣ ва ғояҳои инсондўстонаи халқи кишвар инъикос ёфта, он заминаи ҳуқўқиро барои эҳёи сунату анъанаҳои фарҳангӣ ва бузургдошти муқаддасоти миллӣ фароҳам овард.
Ба муносибати 29-умин солгарди қабули Конститутсияи Ҷумҳурии Тоҷикистон дар Донишкадаи ҳарбии Вазорати мудофиа низ конфренсияи ҷумҳуриявии илмӣ — назариявӣ дар мавзўи “Нақши Конститутсия дар рушди сиёсию идеологии Тоҷикистон”, баргузор гардид, ки дар он намояндагон аз Маркази тадқиқоти стратегии назди Президенти Ҷумҳурии Тоҷикистон, Суди конститутсионии Ҷумҳурии Тоҷикистон, Маркази таълимӣ-методии Кумитаи ҳолатҳои фавқулодда ва Академияи вазорати корҳоии дохила ва дигар олимону муҳақиқон иштирок карда, вобаста ба аҳамияти конститутсия дар ҷомеаи шаҳрвандӣ, конститутсия ҳамчун саннади олӣ ва ҳуҷҷати муҳими таърихӣ, сиёсӣ ва ҳуқуқӣ маърузаҳои илмӣ намуданд.
Роҳбарияти Донишкадаи ҳарбӣ зимни пешниҳоди маърузаи хеш қайд карданд, ки Конститутсия ба сифати қонуни олӣ заминаҳои ҳуқуқии пешрафти ҷомеаро аз тариқи қабули қонунҳои нав гузошта, муносибатҳои ҷамъиятиро ба танзим даровард ва асосҳои ҳуқуқии рушду такомули давлатдории мустақили миллиро фароҳам гардонид.
Ҳамин тавр, иштирокчиён ҳар яке дар навбати худ ба сухан баромада, дар мавзӯъҳои Конститутсияи Ҷумҳурии Тоҷикистон — кафили рушди босуботи кишвар, зуҳуроти беназири таърихию ҳуқуқии он, Конститутсия заминаи дурнамои инкишофи ҷомеа ва Конститусия инъикоскунандаи хусусиятҳои муҳими давлатию ҷамъиятӣ маърузаҳо намудаанд.
Зимнан, аз ҷониби иштирокчиёни конфренсия қайд карда шуд, ки Конститутсияи Ҷумҳурии Тоҷикистон дар ҳаёти мардуми тоҷик санади сарнавиштсоз ба ҳисоб рафта, ифодакунандаи ормонҳои миллӣ мебошад, ки дар он арзишҳои волои инсонӣ таҷассум ёфтааст.
Боқӣ ШАРИФОВ
майор
