Дар асоси талаботи Қонуни Ҷумҳурии Тоҷикистон “Дар бораи рӯзҳои ид” ҳамасола 16-уми ноябр дар кишвар ҳамчун Рӯзи Президенти Ҷумҳурии Тоҷикистон бо шукӯҳу шаҳомати хоса таҷлил карда мешавад. Хизматчиёни ҳарбии Қувваҳои Мусаллаҳи мамлакат низ дар қатори дигар қишри ҷомеа ин ҷашнро ба таври шоиста истиқбол намуда, дар арафаи таҷлили он як қатор чорабиниҳои фарҳангиву варзишӣ ва конференсияҳои илмӣ-назариявӣ ташкилу баргузор намуданд.
Бахшида ба ин санаи пураҳамият дар Донишкадаи ҳарбии Вазорати мудофиаи мамлакат низ Конференсияи ҷумҳуриявии илмӣ-назариявӣ дар мавзӯи “Президенти Ҷумҳурии Тоҷикистон муҳтарам Эмомалӣ Раҳмон-роҳнамои маориф миллӣ” гузаронида шуд, дар он намояндагон аз Донишгоҳи миллии Тоҷикистон, Донишгоҳи давлатии омӯзгории Тоҷикистон ба номи Садриддин Айнӣ, Донишгоҳи байналмилалии забонҳои хориҷии Тоҷикистон ба номи Сотим Улуғзода ва устодону курсантони ин боргоҳи илми ҳарбӣ иштирок намуданд.
Муовини сардори Донишкадаи ҳарбӣ оид ба корҳои илмӣ полковник Раҷабмад Абдураҳмонзода зимни сухани ифтитоҳии худ ҳайати меҳмононро хайрамақдам гуфта, ба кори конференсия ҳусни оғоз бахшид.
Иштирокчиёни ин чорабинии муҳим зимни баромади худ дар мавзӯъҳои “Нақши Пешвои миллат муҳтарам Эмомалӣ Раҳмон дар таҳкими давлатдории миллӣ”, “Сарварии сиёсии Пешвои миллат”, “Мақоми омӯзгор дар меҳвари сиёсати Пешвои миллат”, “Нақши Пешвои миллат дар раванди қабули нишони давлатӣ” маърӯзаҳои пурмазмун намуданд.
Дар идомаи конференсия аз корномаву хизматҳои мондагори Пешвои муаззами миллат дар рушду такомули тамоми соҳаҳои кишвар ибрози назар сурат гирифта, қайд карда шуд, ки маҳз самараи заҳмату талошҳои шабонарӯзии ин абармарди арсаи сиёсат буд, ки имрӯз мо дар кишвари ободу зебо зиндагии шоиста дорем ва ҷомеаи ҷаҳон моро мешиносанду эътироф мекунанд.
Дар фарҷом иштирокчиён аз ҷониби роҳбарияти Доншкадаи ҳарбӣ бо сипосномаву ифтихорнома ва медалҳои ҷашнӣ сарфароз гардонида шуданд.
Шоҳин ШАРИФОВ
