Инак гурӯҳи курсантон, ки бомуваффақият дарсу таълимоти низомиро дар Донишкадаи ҳарбии Вазорати мудофиа аз худ намуда, омодаи хизмат дар сафи Артиши миллӣ мебошанд, ин боргоҳи илми ҳарбиро хатм намуданд. Дар чорабинии пуршукӯҳ ба муносибати хатми навбатии афсарони ҷавон дар ин муассисаи олии касбӣ ҳайатҳои роҳбариву фармондеҳии Вазорати мудофиа, падару модарони курсантон ва афсарону устодон иштирок доштанд.
Чорабинӣ чун оини доимии низомиён бо даровардани Байрақи ҷангӣ ба майдон ва бо садо додани Суруди миллӣ аз ҷониби иштирокчиён оғоз гардид.
Сипас, ҳамаи хатмкунандагон ба сафи пеши майдони баргузории чорабинӣ даъват шуданд, ки дар фазои тантанавӣ ва таҳти навои Оркестри ҳарбӣ-нафасӣ аз ҷониби афсарони олирутбаи Вазорати мудоифаи мамлакат ба онҳо диплом, роҳхат барои кор дар сафи ҷузъу том ва ҳамчун рамзи эҳтирому қадрдонӣ ба хизматҳои падару модарон дар роҳи садоқату саммимияти ватандории фарзандон, ба волидони афсарони ҷавон мактубҳои миннатдорӣ тақдим карда шуд.
Дар ин қисмати чорабинӣ, ки лаҳзаи басо ҳам хотирмону таърихӣ дар ҳаёти онҳо ба ҳисоб меравад, аз ғуруру ифтихори ҳар як хатмкунанда ҳувайдо буд, ки онҳо иҷрои вазифаи афсариро на танҳо рисолати касбӣ, балки рисолати миллии худ дониста, бо садоқат ва ҷасорати ҷавонмардона омодаанд, вазифаҳои бар уҳдаашон вогузоршударо суботкорона амалӣ намоянд.
Хатмкунандагон омодагии ҳамаҷонибаи худро дар назди ҳозирин ва зери Байрақи ҷангии ин муассисаи олии низомӣ бо шарафхониву ибрози садоқат ба Пешвои миллат ва таҳти шиори маъмулу машҳури “Ба халқу Ватан содиқона хизмат мекунем”, баён доштанд.
Дар идомаи қисмати расмии чорабинӣ нахуст вобаста ба таваҷҷӯҳу дастгириҳои Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба хизматчиёни ҳарбӣ ва аъзоёни оилаҳои онҳо муовини вазири мудофиаи Ҷумҳурии Тоҷикистон баромад намуда, афсарони ҷавон ва дар симои онҳо волидону пайвандони эшонро ба муносибати хатми сарбаландонаи фарзандонашон ва сарфароз гардидан бо рутбаи аввалини афсарӣ табрику муборакбод намуд. Дар такя ба нерӯйи созандаву муҳофизатгаронаи ҷавонон қайд карда шуд, ки афсарони касбие, ки шурӯъ аз имрӯз масъулияти хизмат ба халқу Ватан ва муҳофизати сартосарии ин марзу бумро бар дӯш доранд, бояд сарбозони Ватанро низ дар чунин рӯҳия тарбия намуда, саф ба сафи ҳам бо ниҳоди пок ва дасту бозуи қавӣ дар пайи ҳифз ва андар дифои давлату миллат бошанд.
Тибқи маълумоти сохтори кадрии Вазорати мудофиа хатмкунандагони Донишкадаи ҳарбӣ вобаста ба қобилият ва маҳорати кордонии хеш баҳри иҷрои вазифаҳои хизматӣ ба ҳайси афсар асосан ба қисму воҳидҳои низомии Вазорати мудоифа, навъҳои қӯшуни Қувваҳои Мусаллаҳ ва дигар ниҳодҳои ҳарбиву қудратии ҷумҳурӣ фиристонида мешаванд. Тавре иттилоъ дорем, Донишкадаи ҳарбии Вазорати мудофиа дар ибтидои фаъолият дар назди худ ҳадафи таъмини сафи Артиши миллии мамлакат бо кадрҳои баландпояи низомиро дорад, ки ҷиҳати рафъи эҳтиёҷот ба масоили кадрӣ дар Қувваҳои Мусаллаҳ мутахассис омода менамояд.
Маврид ба зикр аст, дар донишкадаи мазкур курсантон дар се факултет ва аз рӯйи 18 ихтиссос ба таълиму тарбия фаро гирифта мешаванд, ки баъд аз чор соли таҳсил бо гирифтани рутбаи аввалини афсарӣ, яъне лейтенант дар сафи ҷузъу том ба иҷрои вазифаҳои масъулиятноки низомӣ оғоз менамоянд. Ҳамин тавр, баъд аз гузашти низомии хатмкуннандагон ва дигар ҳайати шахсӣ, дар майдони назди Донишкада чорабинии фарҳангӣ оғоз гардид, ки ҳунармандони ансамбли “Шараф”-и Вазорати мудофиа бо пешниҳоди барномаи васеи консертӣ ва суруду оҳангҳои ватандӯстона табъи ҳозиринро болида гардониданд.
Боқӣ ШАРИФОВ,
майор
