28-уми декабри соли 2024 дар бинои навбунёди Парлумони Тоҷикистон Паёми Президенти мамлакат муҳтарам Эмомалӣ Раҳмон дар бораи самтҳои асосии сиёсати дохилӣ ва хориҷии ҷумҳурӣ ироа гардид.
Бо мақсади шарҳу тавзеҳи нуктаҳои дахлдор ба ҳаёти низомии кишвар, ки дар Паём зикр гардида буд ва ҳамзамон корҳои фаҳмондадиҳӣ миёни хизматчиёни ҳарбӣ, имрӯз дар толори Вазорати мудофиаи Ҷумҳурии Тоҷикистон бо иштироки ҳайатҳои роҳбариву фармондеҳии Қувваҳои Мусаллаҳ ва намояндаи Маҷлиси намояндагони Маҷлиси Олии Ҷумҳурии Тоҷикистон, чорабинӣ баргузор карда шуд.
Дар ҷараёни чорабинӣ зикр гардид, ки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми имсолаи худ дар баробари таҳлили тамоми соҳаҳои кишвар доир ба вазъи мураккаби ҳарбӣ-сиёсии ҷомеа ва ҷаҳон ибрози ақида намуда, дар оғози суханронии худ зикр карданд, ки “Ҳоло кишвари мо дар марҳалаи нави тараққиёти худ қарор дошта, бо амалӣ намудани стратегияву барномаҳои иқтисодиву иҷтимоӣ ба дастовардҳои назаррас ноил гардида истодааст. Дар баробари ин, нооромиву низоъҳо дар минтақаҳои гуногуни олам, шиддат гирифтани мухолифатҳои сиёсӣ ва таҳримҳо миёни кишварҳои абарқудрат, мусаллаҳшавии бошитоб, «ҷанги сард», тағйирёбии иқлим, инчунин, канда шудани занҷираҳои таҳвили молу маҳсулот ва дигар омилҳои берунӣ моро водор месозанд, ки барои пешгирӣ кардани таъсири манфии онҳо ба иқтисодиёти кишвар тадбирҳои саривақтӣ андешем.”
Эътимоди асосии Пешвои миллат ҷиҳати амалинамоии ҳадафҳои болозикр ин пеш аз ҳама ба Қувваҳои Мусаллаҳ ва мақомоти ҳифзи ҳуқуқу сохторҳои қудратист. Ҳар як шаҳрванди худогоҳу хештаншиноси кишвар, махсусан хизматчиёни ҳарбиро зарур аст, ки бо донишу маҳорати баланд ва зиракиву ҳушёрии сиёсӣ дар андешаи пешрафту шукуфоии Тоҷикистони азиз бошанд ва иҷозат надиҳанд, ки нокасону нохалафон нақшаҳои ғаразноки худро амалӣ созанд.
Дар баробари вогузор намудани вазифаи сангин ва пуршараф, яъне ҳифзу ҳимояи марзу бум, ҳамзамон вазъи иқтисодӣ ва иҷтимоии хизматчиёни ҳарбӣ низ дар партави таваҷҷӯҳи доимии давлату ҳукумат қарор дорад. Ин аст, ки дар панҷ соли охир музди меҳнати амалкунандаи кормандони мақомоти ҳифзи ҳуқуқ, хизматчиёни ҳарбӣ ва дигар кормандони ин мақомот 100 фоиз зиёд карда шуд. Ҳамзамон, шуруъ аз моҳи сентябри соли равон маоши онҳо 20 фоизи дигар зиёд мегардад.
Дар қисмати ҷамъбастии чорабинӣ намояндаи Маҷлиси намояндагони Маҷлиси Олии Ҷумҳурии Тоҷикистон бори дигар аз хизматчиёни ҳарбӣ даъват ба амал овард, ки Паёми Пешвои миллатро сармашқи ҳамешагии фаъолияти худ қарор диҳанд.
Шоҳин ШАРИФОВ
