Бо мақсади шарҳу тавзеҳи нуктаҳои муҳими Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ ва фаҳмондадиҳии меъёрҳои баъзе қонунҳои амалкунанда дар ҷумҳурӣ ба афсарону сарбозон дар раёсати Қӯшунҳои хушкигард вохӯрии судманд доир карда шуд.
Дар чорабинӣ намояндагони Суди Олии Ҷумҳурии Тоҷикистон — афсарони Коллегияи ҳарбӣ як қатор қонунҳо, аз ҷумла Қонуни Ҷумҳурии Тоҷикистон «Дар бораи танзими ҷашну маросим», «Дар бораи масъулият барои таълиму тарбияи кӯдак», «Дар бораи вазъи ҳуқуқии хизматчиёни ҳарбӣ» ва дигар қонунҳои амалкунандае, ки бевосита ба фаъолияту хизмати афсарону сарбозон марбут аст, муфассал шарҳу эзоҳ доданд.
Қайд гардид, ки хизматчиёни ҳарбӣ низ ҳамчун ҷузъи ҷудонашавандаи ҷомеаи Тоҷикистони соҳибистиқлол дар риояву татбиқ намудани қонунҳои мазкур бояд масъулияти ҷиддӣ нишон дода, дастуру ҳидоятҳои Пешвои муаззами миллатро дар ин самт сармашқи кори худ қарор диҳанд.
Сипас, меҳмонон — афсарони Коллегияи ҳарбии Суди Олии Ҷумҳурии Тоҷикистон ҳайати шахсии раёсати Қӯшунҳои хушкигарди Қувваҳои Мусаллаҳро ба муносибати ҷашни 33-солагии Артиши миллӣ табрик намуда, ба онҳо дар роҳи адои рисолати муқаддасашон комёбиву муваффақият орзу намуданд.
