Ҳафтаи равон дар толори “Кохи афсарон”-и Вазорати мудофиаи кишвар ба муносибати таҷлил аз 32-юмин солгарди таъсисёбии Қувваҳои Мусаллаҳи Ҷумҳурии Тоҷикистон чорабинии тантанавӣ баргузор карда шуд. Чорабинии мазкур бо ибтикори Вазорати мудофиа ва дар ҳамбастагӣ бо Кумитаи кор бо ҷавонон ва варзиш роҳандозӣ гардида, дар он муовини вазири мудофиа-генерал майор Музаффар Раҳимзода ва раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон-Зулфиқор Гулаҳмадзода иштирок ва суханронӣ намуданд.
Ҳайати иштирокчиён зимни баромади худ афсарону сарбозони Қувваҳои Муссалаҳи кишварро ба ифтихори ҷашни Артиши миллӣ табрику таҳният гуфта, ба онҳо дар иҷрои рисолати ҷавонмардияшон дар назди Модар-Ватан барору комёбиҳо таманно намуданд.
Боиси ифтихору сарфарозист, ки дар даврони Истиқлолияти давлатӣ обрӯю эътибори Артиши миллӣ дар миёни аҳолӣ, ба хусус ҷавонон афзун гашта, мардуми кишвар хизматҳои шабонарӯзии афсарону аскарони Қувваҳои Мусаллаҳи меҳанро қадр мекунанд ва аз муҳофизони Ватани хеш ифтихор менамоянд, ки ин албатта шоёни таҳсин аст. Чунки низомиёни мамлакат ҳанӯз аз рӯзҳои таъсисёбии Артиши миллӣ дар таҳким бахшидани сохти кониститутсионӣ дар мамлакат, ҳимояи ҳама дастоварду музаффариятҳои истиқлолият, пойдории сулҳу субот, таъмини ҳаёти осоиштаи мардумони Тоҷикистони азиз ва баланд бардоштани иқтидори мудофиавии кишвар саҳми арзанда гузоштаанд.
Таъкид гардид, ки ҷавонон бояд бо азми дил баҳри пойдории сулҳу оромӣ, Истиқлолу озодӣ дар сафи Артиши миллӣ хизмат намоянд, зеро Қувваҳои Мусаллаҳи Ҷумҳурии Тоҷикистон дастоварди муҳими замони соҳибистиқлолии мамлакат буда, омили асосии нигаҳдории давлатдории миллӣ маҳсуб меёбад.
Ба хотири хизмати содиқонаву софдилона ва ҳифзи арзишҳои милливу давлатӣ, ҳамзамон бахшида ба таъсисёбии Қувваҳои Мусаллаҳ, роҳбарият ва чанде аз афсарону сарбозони Вазорати мудофиа бо медали “Шуҷоат ва ҷавонмардӣ” ва Сипосномаву туҳфаҳои хотиравии Кумитаи кор бо ҷавонон ва варзиш қадрдонӣ карда шуданд.
Дар фарҷом аз ҷониби ҳунармандони вазорат чорабинии фарҳангӣ-фароғатӣ доир гардида, сурудҳои ҳарбӣ-ватандӯстӣ пешниҳоди иштирокчиён карда шуд.
Шоҳин ШАРИФОВ
