Дар Сарпрокуратураи ҳарбии Ҷумҳурии Тоҷикистон бо иштироки роҳбарони масъули сохторҳои ҳарбӣ, мақомоти вобастаи давлатии даъват, комиссарони ҳарбӣ ва дигар масъулони ҷузъу томи низомӣ доир ба иҷрои талаботи қонуну санадҳои амалкунада дар самти даъвати шаҳрвандон ба хизмати ҳарбӣ, ҷаласаи васеи ҳайати мушовара баргузор гардид.
Дар ҷаласа қайд карда шуд, ки комиссияҳои даъват, комиссариатҳои ҳарбӣ ва дигар мақомоти масъули даъват ҳамкориро дар сатҳи зарурӣ ва мувофиқ ба талаботи қонунгузорӣ дар соҳаи низомӣ ба роҳ монанд, то ки дар натиҷа ин маъракаи муҳими сиёсӣ ва аҳмияти мудофиавидошта дар мӯҳлати муайянгардида ва бо сифати баланд иҷро гардад.
Зимнан, ба прокуророни ҳарбии гарнизонҳои ҷумҳурӣ таъкид карда шуд, ки назорати риояи дақиқ ва иҷрои якхелаи Қонуни Ҷумҳурии Тоҷикистон “Дар бораи ӯҳдадории ҳарбӣ ва хизмати ҳарбӣ”-ро дар кори комиссияҳои даъват ва комиссариатҳои ҳарбӣ боз ҳам пурзўр намуда, баҳри пешгирию бартараф кардани омилҳои коррупсионӣ ва минбаъд роҳ надодан ба қонунвайронкуниҳо қарорҳои лозимӣ қабул намоянд.
Вобаста ба татбиқи амалии Фармони Президенти Ҷумҳурии Тоҷикистон “Дар бораи ба эҳтиёт рухсат додани хизматчиёни ҳарбие, ки мӯҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1996-2005-и Ҷумҳурии Тоҷикистон ба хизмати ҳарбӣ”, ки аз якуми сентябри соли 2023 ба тасвиб расидааст, дар Прокуратураи ҳарбии гарнизони Душанбе низ ҷаласаи шўрои ҳамоҳангсозии фаъолияти мақомоти ҳифзи ҳуқуқ ва идоракунии ҳарбии ин гарнизон доир гардид.
Зимни баргузории ҷаласаи навбатии пешаздаъватӣ масъулини прокуратураи ҳарбӣ, кормиссарони ҳарбии шаҳри Душанбе, шаҳру ноҳияҳои тобеи ҷумҳурӣ ва командирони қисму воҳидҳои ҳарбии ин гарнизон иштирок доштанд.
Дар кори ҷаласа натиҷаи санҷиши ҳолати риоя ва иҷрои талаботи Қонуни Ҷумҳурии Тоҷикистон “Дар бораи ӯхдадории ҳарбӣ ва хизмати ҳарбӣ” дар комиссияҳои даъват ва комиссариатҳои ҳарбӣ дар даъвати баҳории соли ҷорӣ, кор бо захираҳои даъватӣ ва дигар масъалаҳои марбут ба даъвати шаҳрвандон мавриди таҳлилу баррасӣ қарор гирифт. Зимнан таъкид карда шуд, ки мақомоти масъули даъватро зарур аст, ки дар раванди баргузории чорабиниҳои даъватӣ бо масъулияти баланд амал намуда, даъвати дарпешистодаро дар мӯҳлати муқарраргардида ва бо сифати баланд иҷро намоянд.
Маврид ба зикр аст, ки кормандони мақомоти прокурорӣ дар доираи нақша-чорабиниҳои кории хеш пайваста дар пойгоҳи қисму воҳидҳои ҳарбӣ ҷамъомаду машваратҳои гуногунро доир менамоянд, ки мақсад аз он пешгирии сатҳи содиршавии ҷинояту ҷинояткорӣ ва дигар рафторҳои ғайриоинномавӣ дар ба байни хизматчиёни ҳарбӣ мебошад.
Бокӣ ШАРИФОВ
майор
