Ба муносибати 31-умин солгарди Истиқлолияти давлатии Ҷумҳурии Тоҷикистон, дар толори Вазорати мудофиаи кишвар ҷамъомади тантанавӣ баргузор гардида, ҳамзамон дар ҳама ҷузъу томи Қувваҳои Мусаллаҳ, қисму воҳидҳои алоҳидаи низомӣ ва муассисаҳои таълимии ҳарбии тобеи ин ниҳоди қудратӣ чорабиниҳои сиёсиву фарҳангӣ ва варзишӣ идома доранд.
Ҷамъомади бошукӯҳи идона ба муносибати таҷлил аз 31-умин солгарди Истиқлоли давлатии кишвар, тибқи қавоиди доимии низомиён бо ворид намудани Парчами давлатӣ, Байрақи ҷангӣ ва баъд аз садо додани Суруди миллӣ оғоз гардид.
Дар чорабинии мазкур Котиби Шўрои амнияти ҷумҳурӣ ва роҳбарияти Вазорати мудофиа, дар назди ҳозирин баромад карда, изҳор доштанд, ки Қувваҳои Мусаллаҳи кишвар яке аз дастовардҳои муҳими Истиқлоли давлатӣ ба ҳисоб рафта, он бо дастгирии бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар давоми соҳибистиқлолии мамлакат рушду нумӯъ ёфтааст.
Дар ҷамъомад инчунин вобаста ба марҳилаҳои тайнамудаи Артиши миллӣ қайд карда шуд, ки афсарону сарбозони Қувваҳои Мусаллаҳ дар давоми солҳои истиқлоли миллӣ, озмоишҳои сахту сангинро пушти сар карда, рисолати касбии худро иҷро карда тавонистанд ва таҳти роҳнамоии Пешвои миллат ба як нерӯйи пурзӯру тавоно табдил ёфта, ба комёбиву муваффақиятҳои назаррас ноил гардиданд. Бо итминони комил иброз гардид, ки имрӯз Қувваҳои Мусаллаҳи мамлакат бо омодабошии доимии ҷангӣ, қодир аст, ки вазифаҳои муқаддасу пуршарафи хешро вобаста ба ҳифз ва ҳимояи соҳибихтиёрӣ, таъмини сулҳу суббот, муҳофизати манфиатҳои давлат ва амнияти шаҳрвандон адо намояд ва дар роҳи баланд бардоштани иқтидори мудофиавии кишвар қадамҳои устувор гузорад.
Дар ҷараёни баргузории чорабинии ҷашнӣ ва доираи ҳавасмандгардонии низомиён аз номи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ба чанд нафар аз хизматчиёни ҳарбии Вазорати мудофиа мукофотҳои давлатӣ тақдим карда шуд.
Дар идомаи ҷамъомади идона ҳамзамон бо фармоиши роҳбарияти Вазорати мудофиаи кишвар чанд нафар аз низомиёни ин мақомоти баландпояи қудратӣ, бо Ифтихорномаҳо ва дигар туҳфаҳои хотиравӣ сарфароз гардонида шуданд.
Қобили зикр аст, ки ҳамин гуна чорабиниҳои ҷашнӣ ба муносибати солгарди 31-умин солгарди Истиқлолияти давлатӣ дар қисмҳои низомии Вазорати мудофиа ва дар маҷмӯъ дар тамоми ҷузъу томи Қувваҳои Мусаллаҳи мамлакат дар фазои тантанавӣ идома доранд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
