Дар Сарпрокуратураи ҳарбии Ҷумҳурии Тоҷикистон низ бо иштироки роҳбарони масъули сохторҳои ҳарбӣ, мақомоти вобастаи давлатии даъват, комиссарони ҳарбӣ ва дигар масъулони ҷузъу томи низомӣ доир ба иҷрои талаботи қонуну санадҳои амалкунанда дар самти даъвати шаҳрвандон ба хизмати ҳарбӣ, ҷаласаи васеи ҳайати мушовара баргузор гардид.
Дар ҷаласа масъалаҳои вобаста ба ҳолати иҷрои қонунгузории соҳаи даъват дар даъвати баҳорӣ, инчунин ташкил ва муташаккилона роҳандозӣ намудани даъвати тирамоҳии соли ҷорӣ, ки аз 1-уми октябр оғоз меёбад, мавриди баррасӣ қарор гирифт.
Зикр карда шуд, ки ҳамасола даъвати шаҳрвандон ба хизмати ҳарбӣ дар сатҳи лозимӣ гузаронида шуда, сафи ҷавононе, ки ба таври ихтиёрӣ ба хизмат фиристонида мешаванд, зиёд ва нақшаи даъват иҷро мегардад. Дар баробари ин, комиссияҳои даъватӣ дар баъзе мавридҳо ба қонунвайронкуниҳо роҳ медиҳанд, ки баҳри пешгирию бартараф кардани онҳо қарорҳои дахлдор қабул карда шудаанд.
Ҳамзамон, масъулини мақомоти вобастаи давлатии даъват вазифадор гардиданд, ки даъвати навбатиро дар доираи талаботи қонунҳо ва Фармони Президенти Ҷумҳурии Тоҷикистон “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1997-2006 -и Ҷумҳурии Тоҷикистон ба хизмати ҳарбӣ” амалӣ карда, ин маъракаи муҳими сиёсӣ ва аҳамияти мудофиавидоштаро дар сатҳи баланд ҷамъбаст намоянд.
Боқӣ ШАРИФӢ
подполковник
