Аз аввали моҳи октябри соли равон дар мамлакат даъвати тирамоҳии шаҳрвандони ба хизмати ҳатмии ҳарбӣ оғоз мегардад. Дар робита ба ин, ҳафтаи равон бо иштироки масъулини мақомоти вобастаи давлатии даъват, ҳайатҳои роҳбариву фармондеҳии Вазорати мудофиа, сохторҳои қудратии кишвар, комиссарони ҳарбии вилоятҳо ва шаҳру ноҳияҳои ҷумҳурӣ, як қатор ҷамъомаду чорабиниҳои гуногуни пешаздаъватӣ баргузор гардиданд.
Масоили вобаста ба иҷрои Қонуни Ҷумҳурии Тоҷикистон “Дар бораи ӯҳдадории ҳарбӣ ва хизмати ҳарбӣ” ва диққати аввалиндараҷа зоҳир намудан ба сатҳу сифати чорабиниҳои даъватии шаҳрвандон ба сафи Қувваҳои Мусаллаҳи ҷумҳурӣ яке аз масъалаҳои муҳими ҷаласа буд, ки он бо ҷалби комиссарони ҳарбии вилоятҳо ва шаҳру ноҳияҳои мамлакат доир карда шуд.
Дар робита ба ин, нахуст доир ба дастуру супоришҳои Сарфармондеҳи Олии Қувваҳои Мусаллаҳ, генерали артиш, муҳтарам Эмомалӣ Раҳмон дар самти баланд бардоштани иқтидори мудофиавии давлат ва тақвият бахшидани сатҳи омодабошии ҷангӣ, роҳбарияти Вазорати мудофиа баромад карда, иштирокчиёни ҷаласаро вобаста омўзиши шахсияти даъватшавандагон, интихобу ба сафи Артиши миллӣ фиристодани ҷавонони солиму бардам ва болаёқат, пешгирӣ аз роҳҳои ғайриқонунии даъват ва баҳри сифатан хуб ташкилу ба роҳ мондани ин чорабинии муҳими сиёсӣ вазифагузорӣ намуд. Илова бар ин, дар шаҳру ноҳияҳои ҷумҳурӣ дақиқан муайян кардани шумораи захираҳои сафарбарӣ ва бо ҷалби қувваҳои эҳтиётӣ ташкилу баргузор намудани ҷамъомаду машғулиятҳои нақшавӣ низ яке аз масъалаҳои муҳиму баррасишавандаи ҷаласа ба шумор мерафт.
Бо изҳори нигаронӣ аз вазъи ноустувор ва зудтағйирёбандаи ҷаҳони муосир таъкид карда шуд, ки ба масоили таҳким бахшидани тамоми самту соҳаҳои Артиши миллӣ, бо масъулияти баланд муносибат намудан дар самти иҷрои вазифаву ӯҳдадориҳои хизматӣ, пешгирӣ намудани сатҳи содиршавии ҳама гуна қонуншиканиҳо, ба хусус ҷиноятҳои хусусияти коррупсионидошта, ташкили ҳамоҳангӣ бо мақомоти масъули вобастаи давлатии даъват, бурдани корҳои фаҳмондадиҳӣ дар байни мардум ва ҷавонони синни даъватӣ ва баҳри роҳандозӣ намудани ҳамкории мутақобилан судманд бо аҳли ҷомеа, диққати аввалиндараҷа равона карда шавад.
Дар охири ҷаласа оид ба рафъи монеаву мушкилоти даъвати баҳории соли равон, саривақт бартараф намудани камбудиҳои мавҷуда ва баҳри дар сатҳи зарурӣ ташкилу ба роҳ мондани даъвати тирамоҳии шаҳрвандон ба хизмати ҳатмии ҳарбӣ масъулини дахлдори Вазорати мудофиа бо дастуру супоришҳои мушаххас вазифадор карда шуданд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
