Ҳар як ҷавонписари ба синни хизматрасида баъди ҳозир гардидан ба комиссариатҳои ҳарбӣ номи даъватшавандаро мегирад ва баъди гузаштан аз комиссияи даъватӣ ва шомил гардидан ба ҳайати қисмҳои низомӣ унвони наваскар ё худ сарбози қаториро соҳиб мешавад.
Дар чанд рўзу ҳафтаҳои нахустини хизмат, сарбозони ҷавон дар баробари шиносоӣ аз муҳиту шароит ва вазифаву ӯҳдадориҳои қисми низомӣ тибқи нақшаи барномаи таълимии Ҷанговари ҷавон” ба дарсу машғулиятҳои кӯтоҳмуддати наваскарӣ ҷалб мешаванд, то барои пешбурди хизмати минбаъда ҳамаҷониба омода гарданд. Чун барномаи таълимии “Ҷанговари ҷавон” ба анҷом расид, наваскарон Савганди ҳарбӣ қабул намуда, сарбози комилҳуқуқ мешаванд ва номи пурифтихори муҳофизи Ватанро мегиранд.
Дар қисми низомии 02011-и Қўшунҳои зудамал низ чун дигар ҷузъу томи Артиши миллӣ сарбозон дар ҳайати взводу ротаҳо тақсим гардида, ҳамарўза дар сафороии пагоҳирўзӣ аз ҷониби командирон тибқи нақшаи рўзмарраи хизматӣ вазифадор мегарданд.
Ҳар як дарсу машғулият дар вақту соати муқаррарӣ ва мувофиқи мавзӯъ аввалан як муддати муайян дар синфхонаҳои таълимӣ ба таври назариявӣ ҷараён мегирад ва баъдан он тариқи амаӣ ташкилу ба роҳ монда мешавад.
Машғулиятҳои амалии сарбозон асосан дар дохил ва ҳудуди қисмҳои низомӣ доир мешаванд, ки ҳайати шахсӣ бо тайёрии ҳамаҷониба ба дарси пешбинигардида ба нуқтаҳои таълимӣ раҳсипор мегарданд.
Азбаски таъйиноти ин қисми низомӣ омода кардани ҷанговаронро дар шароити дашту саҳро ва кўҳистон дар бар мегирад, барномаи таълимии гурӯҳи сарбозони чорабиниҳои махсуси он низ дар яке аз минтақаҳои душворгузари наздик ба ҳудуди ин қисми ҳарбӣ доир карда шуд.
Бояд тазаккур дод, ки қисми низомии 02011-и Қўшунҳои зудамал баталиони навтаъсис буда, он соли 2011 бо дастгирии Сарфармондеҳи Олии Қувваҳои Мусаллаҳ, генерали артиш мӯҳтарам Эмомалӣ Раҳмон дар яке аз манотиқи баландкўҳи кишвар аз сифр бунёд карда шудааст.
Воқеан, биноҳои хуштарҳу замонавӣ, шароитҳои хуби хизмативу майишӣ ва ҳам таълимиву фароғатӣ имконият медиҳад, ки афсарону сарбозон бо қаноатмандӣ хизмати Модар-Ватанро сарбаландона пеш баранд ва дар муддати муайяни хизмати ҳатмии ҳарбӣ муҳофизони ҳақиқии ин марзу буми аҷдодӣ гарданд.
Фаридун МАҲМАДАЛИЗОДА,
полковник
