Пас аз чаҳор соли таҳсил ва бомуваффақият ба итмом расонидани дарсу таълимоти низомӣ дар Донишкадаи ҳарбии Вазорати мудофиаи Ҷумҳурии Тоҷикистон, шумораи муайяни курсантон ин муассисаи олии ҳарбиро бо сарбаландӣ хатм намуданд. Афсарони ҷавон баҳри иҷрои рисолати касбӣ, ҷиҳати саҳмгузорӣ дар таъмини амнияти давлат ба ҳайати ҷузъу томи Қувваҳои Мусаллаҳ ва дигар сохторҳои низомии кишвар шомил гардиданд. Ба ин муносибат дар Донишкадаи ҳарбӣ бо иштироки ҳайати роҳбариву фармондеҳии Вазорати мудофиа, падару модарони курсантон ва афсарону устодон чорабинии тантанавӣ баргузор гардид, ки он ҳамчун рамзи эҳтирм ва арҷгузорӣ ба муқаддасоти милливу давлатӣ бо садо додани Суруди миллӣ аз ҷониби иштирокчиён оғоз ёфт.
Сипас, ҳамаи хатмкунандагон ба сафи пеши майдони баргузории чорабинӣ даъват шуда, аз ҷониби роҳбарияти Вазорати мудофиаи мамлакат ва ҳайати афсарону устодони ин боргоҳи илму маърифат дар фазои тантанваӣ бо диплом, роҳхат барои кор дар сафи ҷузъу томҳои Артиши миллӣ ва дигар сохторҳои низомии кишвар сарфароз гардиданд.
Дар ин қисмати чорабинӣ, ки лаҳзаи басо ҳам хотимону таърихӣ дар ҳаёти онҳо ба ҳисоб меравад, аз ғуруру ифтихори ҳар як хатмкунанда ҳувайдо буд, ки онҳо иҷрои вазифаи афсариро натанҳо рисолати касбӣ, балки рисолати миллии худ дониста, бо садоқат ва ҷасорати ҷавонмардона омодаанд вазифаҳои бар ӯҳдаашон вогузоршударо содиқонаву софдилона иҷро намоянд.
Хатмкунандагон омодагии ҳамаҷонибаи худро дар назди ҳозирин ва зери байрақи ҷангии ин муассисаи олии низомӣ бо шарафхониву ибрози садоқат ба Пешвои миллат ва таҳти шиори маъмулу машҳури ба халқу Ватан содиқона хизмат мекунем, собит намуданд.
Вобаста ба таваҷҷуҳу дастгириҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон нисбат ба хизматчиёни ҳарбӣ вазири мудофиаи мамлакат, генерал-лейтенант Собирзода Эмомалӣ баромад намуда, қайд кард, ки афсарони касбӣ шурӯъ аз имрӯз масъулияти хизмат ба халқу Ватан ва муҳофизати сартосарии ин марзу бумро бар дӯш доранд.
Ба ифтихори хатми навбатии таълимгирандагон дар Донишкадаи ҳарбӣ ҳайати шахсии ин муассисаи олии касбии мамлакат гузашти низомӣ доир намуда, бо қадамҳои сафӣ ва устуворонаи хеш омодагии худро барои идомаи хизмат дар сафи Артиши миллӣ нишон доданд.
Боқӣ ШАРИФӢ,
подполковник
