Вазъи зудтағйирёбанда ва пуртазоди ҷаҳони муосир ҳайатҳои роҳбариву фармондеҳӣ ва хизматчиёни ҳарбии сатҳу зинаҳои гуногуни Артиши миллии мамлакатро ба он водор менамояд, ки сатҳи донишу малака ва тайёрии ҷангии хешро пайваста сайқал дода, доимо дар ҳолати омодабош қарор дошта бошанд ва баҳри боз ҳам баланд бардоштани иқтидори мудофиавии кишавар ҷаҳду талош намоянд.
Масоили вобаста ба дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти баланд бардоштани иқтидори мудофиавии кишвар доимо, дар маркази диққати ҳайатҳои роҳбариву фармондеҳии Артиши миллии мамлакат қарор дошта, дар ин замина, аз ҷониби хизматчиёни ҳарбии ҳама зинаҳо, корҳои зиёде амалӣ карда мешаванд.
Ҷаласае, ки бо иштироки котиби Шӯрои амнияти ҷумҳурӣ, Насрулло Маҳмудзода, вазири мудофиаи мамлакат Шералӣ Мирзо, фармондеҳони навъи Қувваҳои Мусаллаҳ, Сарпрокурори ҳарбӣ, масъулини Ташкилоти ҷамъиятии “Мададгори мудофиа”, намояндагони Кумитаи давлатии амнияти миллӣ, сардорони раёсатҳои Дастгоҳи марказии Вазорати мудофиа, Ситоди генералии Қувваҳои Мусаллаҳ, комиссарони ҳарбии вилоятҳо ва командирони сатҳу зинаҳои гуногуни қисмҳои низомӣ баргузор гардида, дар он фаъолият ва бурду бохти Артиши миллӣ дар давоми шаш моҳи соли равон мавриди таҳлилу баррасии ҳамаҷониба қарор гирифт.
Дар ин замина, бо дарназардошти вазъияти бисёр мураккаби имрӯзаи минтақа ва ҷаҳон, дар ҳолати омодабошии доимӣ қарор додани нерӯҳои мусаллаҳи ҷумҳурӣ, сардори Ситоди генералии Қувваҳои Мусаллаҳ, муовинони вазири мудофиа ва дигар иштирокчиёни ҷаласа бо таҳлили ҳамаҷониба дар назди ҳозирин баромад намуда, оид ба пешравию муваффақиятҳо, камбудиву норасоиҳо доир ба ҷамъбасти даври якуми омӯзишӣ, такмил додани савияи донишу малакаи хизматчиёни ҳарбӣ, натиҷаҳои даъвати баҳории шаҳрвандон ба хизмати ҳарбӣ, омӯзиш ва муайяну мушаххас намудани захираҳои сафарбарӣ, таъминоти воситаҳои моддӣ-техникӣ, ташкили дарсу машғулиятҳои амалии саҳроӣ, машқҳои муштараки ҳарбӣ, тайёрии ҷангии ҷузъу томҳо ҳангоми баргузор намудани амалиёти ҳарбӣ, таъминоти ақибгоҳӣ, самаранок истифода бурдани заминҳои кишоварзӣ, вазъи қонунияту тартиботи ҳуқуқӣ, боз ҳам баланд бардоштани интизоми ҳарбӣ ва роҷеъ ба дигар масъалаҳои соҳавӣ маъруза карда, барои фаъолияти минбаъда ва дар доираи нақша-чорабиниҳои тарҳрезигардида, таклифу пешниҳодоти мушаххас намуданд.
Тавре иттилоъ дода шуд, аз аввали соли равон сарфи назар аз моневу мушкилоти мавҷуда, ҳайати шахсии Вазорати мудофиаи мамлакат тавонистанд, ки бо дастгирии бевоситаи Сарфармондеҳи Олии Қувваҳои Мусаллаҳ, генерали артиш, муҳтарам Эмомлаӣ Раҳмон тамоми чорабиниҳои нақшавиро ба пуррагӣ ва дар сатҳи зарурӣ иҷро намоянд. Ҳамчунин, барои баланд бардоштани қудрати мудофиавии кишвар, қадамҳои устувор гузоранд.
Зимни таҳлилу натиҷагирӣ намудани самтҳои фаъолияти соҳавии Вазорати мудофиа ва сохторҳои зертобеи он, Котиби Шӯрои амнияти ҷумҳурӣ ва роҳбарияти Вазорати мудофиа ба сухан баромада, иброз доштанд, ки Сарфармондеҳи Олии Қувваҳои Мусаллаҳ, генерали артиш, муҳтарам Эмомалӣ Раҳмон нисбат ба Артиши миллӣ таваҷҷӯҳи хоса равона карда, хизмати содиқонаву софдилонаи хизматчиёни ҳарбиро пайваста қадрдонӣ мекунанд ва нисбат ба ҳар як афсару сарбоз ғамхории доимӣ зоҳир менамоянд. Пойдории сулҳу субот, ваҳдату ягонагӣ, ҳифзи марзу буми аҷдодӣ ва таҳкиму пойдории Истиқлоли давлатӣ аз заҳмати шабонарӯзӣ ва хизмати содиқонаи низомиён ва кормандони мақомоти ҳифзи ҳуқуқи мамлакат вобастагӣ дорад.
Дар идомаи ҷаласа инчунин вобаста ба фаъол гардидани равияву ташкилоти тундрави террористиву экстремистӣ, ки имрӯз ҷомеаи ҷаҳониро нигарон кардааст, ибрози назар карда шуд. Дар ин замина, бо назардошти вазъияти пешгӯйинашаванда таъкид гардид, ки хизматчиёни ҳарбӣ ва кормандони мақомоти ҳифзи ҳуқуқи мамлакатро дар чунин шароити пуртазод ва бисёр ҳассоси ҷаҳони имрӯза мебояд, ки дар самти ҳимояи марзҳои давлатӣ, тақвият бахшидани сатҳи омодабошии ҷангии ҷузъу томҳо, бо тайёрии доимӣ истодагарӣ намудан бар зидди ҳама гуна таҳдиду хатарҳои воқеъӣ, аз даст надодани ҳушёриву зиракӣ ва бо масъулияти баланди фарзандӣ муносибат намудан ба иҷрои вазифаву уҳдадориҳои хизматиро талаб менамояд.
Дар охир, аз ҷониби Котиби Шӯрои амнияти ҷумҳурӣ ва роҳбарияти Вазорати мудофиа, иштирокиёни ҷаласа ва масъулини дахлдор дар муҳлатҳои муқарраршуда бо супоришҳои мушаххас вазифадор гардиданд ва дар ин радиф инчунин, ҳайаҳори роҳбариву фармондеҳии Қувваҳои Мусаллаҳ, шиореро таҳти унвони “30-солагии Қувваҳои Мусаллаҳро бо омодабошии баланди ҷангӣ, интизоми намунавӣ ва бунёдкориву созандагӣ истиқбол мегирем!” қабул намуданд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
