Ҷаласа оид ба ҷамбасту натиҷагирӣ аз фаъолияти Вазорати мудофиаи мамлакат, бо иштироки ҳайатҳои роҳбарии фармондеҳии ин ниҳоди қудратӣ, масъулини навъи қӯшунҳои Қувваҳои Мусаллаҳи ҷумҳурӣ, комиссарони ҳарбии вилоятҳо ва командирони қисму воҳидҳои алоҳидаи низомӣ баргузор гардид.
Дар оғози ҷаласа бурду бохти Вазорати мудофиаи мамлакат ва фаъолияти ҳамаҷонибаи ин ниҳоди қудратӣ мавриди таҳлилу баррасӣ ва натиҷагирӣ қарор дода шуд. Сардори Ситоди генералии Қувваҳои Мусаллаҳ ва чанде аз муовинони вазири мудофиа зимни баромади худ доир ба вазъи минтақа ва ҷаҳон, тақвият бахшидани сатҳи тайёрии ҷангии Артиши миллӣ, чорабиниҳои сафарбарӣ, ҳолати таъмини бехатарии хизмати ҳарбӣ, фаъолияти хадамоти қӯшунҳо, тайёрии амалиётӣ, вазъи қонунияту тартиботи ҳуқуқӣ, интизоми ҳарбӣ, андешидани тадбирҳои зарурӣ дар самти таъминоти ҳамаҷонибаи воситаҳои моддӣ-техникӣ, рушди соҳаи ақибгоҳиву хоҷагиҳои ёрирасон ва оид ба дигар масъалаҳои марбут ба самтҳои фаъолияти соҳавии ин ниҳоди қудратӣ, дар назди ҳозирин маърӯза карданд.
Баъд аз муҳокимаи масъалаҳои зикрёфта, вазири мудофиаи мамлакат Шералӣ Мирзо қайд кард, ки Президенти Ҷумҳурии Тоҷикистон, мӯҳтарам Эмомалӣ Раҳмон, дар ҳалли ҳама масоили амниятӣ диққати аввалидараҷа зоҳир намуда, фаъолият ва бурду бохти сохторҳои низомии мамлакатро таҳти назорати доимӣ қарор додаанд. Аз ин рӯ таъкид карда шуд, ки хизматчиёни ҳарбии ҳама зинаҳо ва мартабаҳо вазифаҳое, ки аз ҷониби Сарфармондеҳи Олии Қувваҳои Мусаллаҳ, генерали артиш, мӯҳтарам Эмомалӣ Раҳмон бар дӯши мо низомиён вогузор менамоянд, диққати аввалиндараҷа зоҳир карда, онро роҳнамои фаъолияти рӯзмарраи хеш қарор диҳанд ва иҷрои тамоми дастуру супоришҳоро дар мӯҳлатҳои муайянгардида таъмин намоянд.
Дар охири ҷаласа роҳбарияти Вазорати мудофиа баҳри ислоҳу бартараф намудани камбудиҳои ҷойдошта, ташкили хизмати қӯшунҳо, сифатан хуб ба роҳ мондани чорабиниҳои даъватии шаҳрвандон ба хизмати ҳарбӣ, тақвият бахшидани омодабошии ҷангӣ, корҳои сиёсӣ-тарбиявӣ, ташкили машғулиятҳои омодагии сафарбарӣ, қабулу ҷобаҷокунии наваскарон дар қисмҳои низомӣ, таъмини онҳо бо шароитҳои зарурӣ, аз сафи Қувваҳои Мусаллаҳ дар сатҳи баланд гусел намудани сарбозони мӯҳлати хизматро адо намуда, омодагии масъулин ба фасли сармо, ҳолати нигаҳдорӣ ва истифодабарии техникаҳои зиреҳпӯши ҷангиву автомобилӣ, рушди соҳаи кишоварзӣ ва вобаста ба ҷоннок намудани тамоми самтҳои фаъолияти соҳавӣ, иштирокчиён ва дигар масъулини ин ниҳоди қудратиро бо супоришҳои мушаххас вазифадор намуданд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
