Нимаи дуюми моҳи декабри соли равон, дар толори асосии Вазорати мудофиаи Ҷумҳурии Тоҷикистон аз ҷониби масъулини комиссияи даъвати ҷумҳуриявӣ, ҳайати роҳбариву фармондеҳӣ ва дигар шахсони масъул, натиҷаи даъвати баҳориву тирамоҳиро мавриди таҳлилу натиҷагирӣ қарор доданд.
Ҷамъомади муштараки ҷумҳуриявӣ, бо иштироки мувони сарвазири мамлакат-раиси Комиссияи даъватии ҷумҳуриявӣ-Матлубахон Сатториён ва масъулини мақомоти вобастаи давлатии даъват ҷараён гирифта, дар он рафти даъвати баҳориву тирамоҳии соли 2021, пешравию навгониҳо дар ин самт ва монеаю мушкилоти ҷойдошта дар фаъолияти баъзе аз мақомоти масъули даъватии шаҳру ноҳияҳо мавриди таҳлилу баррасӣ қарор гирифт.
Аз ҷумла, дар ҷамъомад қайд гардид, ки ҳамасола новобаста аз иҷрои пурраи нақшаи даъвати шаҳрвандон ба хизмати ҳарбӣ ва дигар пешравиҳои назаррас, таҳлилҳо нишон медиҳанд, ки дар натиҷаи бемасъулиятиву хунукназарии баъзе аз комиссияҳои даъватии шаҳру ноҳияҳои мамлакат, ҳамоно як қатор монеаҳо, аз қабили, наомӯ 
хтани шахсияти даъватшавандаҳо, дар комиссариатҳои ҳарбӣ тибқи тартиби муқарраргардида ва дар муҳлатҳои муайян аз қайди ҳарбӣ дур мондани шаҳрвандон, муоинаи нодурусти ташхиси тиббӣ, ҳозир нагардидани баъзе аз ҷавонон ба комиссияҳои давлатӣ, ошкор гардидани кирдорҳои коррупсионӣ ва дигар мушкилот ба мушоҳида расиданд, ки чунин ҳолатҳо аз масъулини вобастаи комиссияҳои даъватӣ муносибати ҷиддиро дар самти ташкили фаъолити ҳамаҷониба тақозо менамояд.
Дар ҷамъомад, ҳамзамон таъкид карда шуд, ки шумораи ҷавонони синну соли даъватӣ нисбат ба талаботи Қувваҳои Мусаллаҳ хеле зиёд аст ва ин имконият медиҳад, ки аз байни ҷавонони ҳама табақаҳои аҳолии қишвар беҳтаринҳо интихоб ва ба хизмати ҳатмии ҳарбӣ даъват карда шаванд. Дар охири ҷамъомади мазкур, бо мақсади бартараф намудани камбудиву монеаҳои дар боло зикргардида, баҳри дар сатҳи баланд ва бо сифати хуб ба роҳ мондани чорабиниҳои даъватӣ дар соли 2022, иштирокчиёни ҷамъомад ва масъулини мақомоти вобастаи давлатии даъват бо супоришҳои мушаххас вазифадор карда шуданд.
Фаридун МАҲМАДАЛИЗОДА,
сардори Маркази матбуот,
полковник
