Дар арафаи таҷлил аз 30-юмин солгарди таъсисёбии Қувваҳои Мусаллаҳ, дар назди Донишгоҳи байналмилалии сайёҳӣ ва соҳибкории Тоҷикистон кафедраи ҳарбӣ ба фаъолият оғоз намуд, ки дар расми ифтитоҳи он масъулини Вазорати мудофиа, роҳбарияти донишгоҳ ва омӯзгорону кормандони кафедраи ҳарбии болозикр иштирок намуданд.
Бояд қайд намуд, ки нақши кафедраҳои ҳарбӣ дар омода намудани мутахассисони низомӣ басо назррас аст. Ҳамасола садҳо ҷавони ғаюру матинирода кафедраҳои мазкурро хатм намуда, ҳамчун мутахассис ба сафи ҷузъу томи Артиши миллӣ мепайванданд.
Зимни суханронии худ намояндаи Вазорати мудофиа фаъолияти боз як кафедраи ҳарбиро барои устодону донишҷӯёни Донишгоҳи байналмилалии сайёҳӣ ва соҳибкории Тоҷикистон муборакбод намуда, ифтитоҳи онро туҳфаи идона барои донишҷӯён арзёбӣ намуд.
Роҳбарияти донишгоҳ дар ҷараёни чорабинӣ барои мусоидат ва ба фаъолият оғоз намудани кафедраи ҳарбӣ ба масъулини Вазорати мудофиа изҳори сипосу қаноатмандӣ намуда, тамоми роҳбарони воҳидҳои сохтории донишгоҳро муваззаф намуд, то фаъолияти кафедраи ҳарбии назди донишгоҳро тибқи нақша-чорабиниҳои тасдиқгардида роҳандозӣ намуда, баҳри ба яке аз кафедраҳои ҳарбии намунавӣ дар муддати кӯтоҳтарин мубаддал гардонидани он тамоми шароиту имкониятҳои мавҷударо истифода намоянд.
Маврид ба зикр аст, ки то ин дам дар назди ҳашт донишгоҳу донишкадаҳои олии мамлакат кафедраҳои ҳарбӣ амал менамоянд ва баробари ба фаъолият оғоз намудани Кафедраи ҳарбии Донишгоҳи байналмилалии сайёҳӣ ва соҳибкории Тоҷикистон шумораҳои онҳо ба нуҳ адад расид.
Шоҳин ШАРИФОВ
