Коррупсия зуҳуроти номатлуб ва барои ҷомеа хатарнок ба ҳисоб рафта, мубориза ба зидди он вазифаи асосии мақомоти давлатӣ, ниҳодҳои ҷомеаи шаҳрвандӣ ва ҳар як сокини кишвар мебошад.
Эмомалӣ Раҳмон
Ҷомеаи ҷаҳониро зарур омад, ки алайҳи ришвахорию фасодкорӣ ҳамчун зуҳуроти номатлуби коррупсионӣ чораҳои мушаххаси қонунӣ андешад. Барои пешгирӣ аз ҳама ҷинояту ҷинояткорӣ ва мубориза бар зидди ҳолатҳои коррупсионӣ санаи 31-уми октябри соли 2003 оид ба пешгирӣ аз кирдорҳои ба ҷамъият хавфнок ришваситонӣ ва сӯйистифода аз мансаб Конвенсияи Созмони Миллали Муттаҳид бар зидди коррупсияро қабул намуд. Санаи 9-уми декабри соли 2003 дар конфронси сиёсӣ зиёда аз 100 давлати дунё ба Конвенсияи мазкур имзои тасдиқӣ гузоштанд. Ҷумҳурии Тоҷикистон низ ҳамчун узви комилҳуқуқи ҷомеаи ҷаҳонӣ дар қатори дигар давлатҳо санаи 25-уми сентябри соли 2006 ба Конвенсияи мазкур имзо гузошт ва онро ба низоми ҳуқуқии кишвар ворид намуд.
Бо иқдоми бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади мубориза бар зидди ҷиноятҳои дорои хусусияти коррупсионидошта 10-уми январи соли 2007 Агентии назорати давлатии молиявӣ ва мубориза бо коррупсияи Ҷумҳурии Тоҷикистон ҳамчун муборизабаранда бар зидди амалҳои коррупсионӣ ва зуҳуроти ба ҷамъият хавфнок таъсис дода шуд.
Мусаллам аст, ки фасодкорӣ ё худ коррупсия бо унвони вабои аср шинохта шуда, қарорҳои муқовимат бар зидди он ҳамеша аз ҷониби созмону ташкилотҳои байналмилалӣ, махсусан Созмони Милали Муттаҳид ҳамчун яке аз вазифаҳои аввалиндараҷа эътироф карда шудааст.
Аз ин лиҳоз баҳри банақшагирии фаъолияти давлат дар самти муқовимат бо коррупсия бо қарори Ҳукумати Ҷумҳурии Тоҷикистон аз 26-уми январи соли 2008, таҳти №34 маротибаи аввал барномаи зиддикоррупсионии давлатӣ “Стратегияи мубориза бо коррупсия дар Ҷумҳурии Тоҷикистон барои солҳои 2008-2012” ба тасвиб расида, мавриди омӯзиш қарор дода шуд ва баъди ба охир расидани мӯҳлати амали он, бо Фармони Президенти Ҷумҳурии Тоҷикистон аз 30-юми августи соли 2013, таҳти №1504 “Стратегияи муқовимат ба коррупсия дар Ҷумҳурии Тоҷикистон барои солҳои 2013-2020” қабул гардида, ҳамчун пешгирӣ аз зуҳуроти номатлуби ҷамъиятӣ мавриди омӯзиш қарор дода шуд.
Инчунин ба санадҳои зикр гардида, бо мақсади фароҳам овардани чораҳои зидди коррупсионӣ дар асоси Фармони Президенти Ҷумҳурии Тоҷикистон аз 3-юми августи соли 2021, таҳти №222 “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” барои омӯзиши ҳамаҷониба ва барои пешгирии ҳолатҳо коррупсионӣ қабул карда шуд.
Мавриди зикр аст, дар ҳама давлатҳо ин зуҳуроти ба ҷамъияту давлат хатаровар мушоҳида мегардад, ки масъулини давлату ҳукумат барои пешгирӣ аз ин зуҳурот конвенсияҳову қонунҳои амалкунанда қабул менамоянд ва амсоли чунин қарору қонунҳои амалкунанда дар Ҷумҳурии Тоҷикистон қабул гардидаанд ва имрӯз барои пешгирӣ аз зуҳуротҳои хатарбори коррупсионӣ фаъолият доранд, ки то ин дам чандин аз қонуншиканҳоро дар назди давлату ҷомеа Разоҳои сангин додаанд.
Ҷомӣ РАҶАБЗОДА,
Муаллими калони сикли тайёрии умумиҳарбии
Кафедраи ҳарбии Донишгоҳи техникии Тоҷикистон
ба номи академик М. С. Осимӣ,
подполковник
