Тақвият бахшидани донишу малакаи касбии низомиён, такмили маҳорати соҳавӣ ва сайқал додани таҷрибаи пешқадам дар самти пешбурди хизмати шабонарӯзии ҳайати шахсӣ ин ҷорӣ намудани роҳу усулҳои наву муосири омӯзишӣ дар фаъолияти рӯзмарраи ҷузъу том маҳсуб меёбад. Аз ин хотир, ҳамасола вобаста ба оғози давраҳои якум ва дуюми омӯзишӣ дар Қувваҳои Мусаллаҳ бо ҷалби ҳайатҳои роҳбариву фармондеҳии Вазорати мудофиа, навъи қӯшунҳо ва командирони сатҳу зинаҳои гуногуни Артиши миллӣ ҷамъомаду машғулиятҳои мухталифи назариявӣ ва амалии саҳроӣ ташкилу ба роҳ монда мешаванд.
Аз ҷумла, ҷамъомади методӣ-таълимӣ ин навбат бо ҷалби ҳайатҳои роҳбариву фармондеҳии сатҳу зинаҳои гуногуни сохторҳои зертобеи Вазорати мудофиа, мувофиқ ба тартибу низоми муайяншуда, дар вақту соати муқарраргардида, бо саф оростану азназаргузаронии ҳайати шахсии иштирокчиён ва расонидани нақшаи баргузории он давоми 2 рӯз ҷараён гирифт.
Дар рӯзи аввали ин чорабинии муҳими низомӣ аз ҷониби масъулини Ситоди генералии Қувваҳои Мусаллаҳ ба ҳайати иштирокчиёни ҷамъомад доир ба вазъияти ҳарбӣ-сиёсии минтақа ва ҷаҳон, паёмадҳои он ва татбиқи тадбирҳои муайян дар самти эҳтимолияти хатарҳо маълумоти муфасал пешкаш карда шуд.
Рӯзи дуюми машғулиятҳои методӣ-таълимӣ дар машқгоҳи ҳарбии “Фахробод”-и гарнизони Хатлон идома ёфт.
Дар майдони сафороии машқгоҳи “Фахробод” сардори Ситоди генералии Қувваҳои Мусаллаҳ, муовинони вазири мудофиа ва масъулини вобастаи ин чорабинии муҳими низомӣ доир ба нақшаи баргузорӣ ва ҳадафу моҳияти ҷамъомади мазкур ибрози назар карда, аз иштирокчиёни он муносибати ҷиддиро дар самти аз бар кардани машғулиятҳои таълимӣ ва дар доираи имконоти мавҷуда ҷорӣ намудани усулҳои нави омӯзиширо вобаста ба тақвият бахшидани фанҳои мухталифи ҳарбӣ дар қисму воҳидҳои низомӣ талаб намуданд.
Бо ҳамин тартиб, иштирокчиёни ҷамъомад вобаста ба сатҳи вазифавӣ ба чор гурӯҳ тақсим шуда, таълимоти назариявии онҳо дар самти омӯзишу аз бар намудани мавзеъу минтақаҳои ҷуғрофии маҳалли амалиёт, марҳилаҳои тайёрӣ ба он, роҳу усулҳои сафарбарии қӯшунҳо, тарзи идора намудани ҷузъу том, муайян ва мутобиқ намудани вазъи рӯҳию равонии ҷанговарон, омода будан ба ҳуҷуми мусаллаҳонаи нобаҳангом, тартиби бурдани хизмати қаровулӣ, ҷобаҷогузории нарияди шабонарӯзӣ, роҳандозӣ намудани тадбирҳои муҳим дар самти ҳимояи шаҳрчаҳои ҳарбӣ ва умуман дигар мавзуоти марбут, ки ба сатҳи омодагии ҳамаҷонибаи хизматчиёни ҳарбӣ зарур мебошад, мавриди омӯзиш ва санҷиш қарор дода шуд.
Дар қисмати амалии машғулиятҳо, иштирокчиёни ҷамъомади методӣ-таълимӣ оид ба коркард ва ташкили амалиёти мусаллаҳонаи ҳарбӣ, тирпарронӣ аз силоҳу муҳиммоти сабуки ҷангӣ, истифодаи техникаҳои мухталифи ҳарбӣ, шиносоӣ бо дастгоҳу таҷҳизотҳои муҳандисӣ-сапёрӣ, омодагии варзишӣ ва аз рӯйи дигар мавзуоти марбут ба машғулиятҳои омӯзишӣ дар назди масъулини раёсатҳои дахлдори Дастгоҳи марказии вазорат ва Ситоди генералии Қувваҳои Мусаллаҳ санҷиш супурданд.
Маврид ба зикр аст, ки вобаста ба мавзуъҳои гуногуни соҳавӣ дар чунин ҷамъомадҳои методӣ-таълимӣ ҳар дафъа талаботи нав ва навовариҳои зиёде ворид карда мешаванд. Зеро, авзои пуртазоди ҷомеаи муосир низомиёни ҳама зинаҳо ва мартабаҳоро ба он водор менамояд, ки донишу малака, маҳорати касбӣ ва таҷрибаи соҳавии худро пайваста сайқал диҳанд ва дар ҳамагуна вазъият бар зидди таҳдиду хатарҳои эҳтимоливу воқеӣ омода бошанд.
Бо ҳамин тартиб, ҳамасола роҳбарият ва масъулини Вазорати мудофиа бо ташкилу баргузор намудани чунин ҷамъомадҳои методӣ-таълимӣ ҳадафмандона кӯшиш ба харҷ медиҳанд, ки иштирокчиёни машғулиятҳо аз ҳамдигар таҷрибаомӯзӣ кунанд, донишу малакаи хешро сайқал диҳанд, роҳу усулҳои нави омӯзиширо дар қисму воҳидҳои низомии зертобеи худ амалан ҷорӣ созанд ва муҳимтар аз ҳама, дар самти иҷрои вазифаву уҳдадориҳои хизматӣ бо масъулияти баланд ва содиқонаву софдилона муносибат намоянд.
Барои маълумот ёдовар мешавем, ки ҳамасола чунин ҷамъомад ё худ машғулиятҳои методӣ-таълимӣ вобаста ба давраҳои омӯзишӣ дар Қувваҳои Мусаллаҳ, аз аввали моҳи январ оғоз гардида, то охири моҳи май идома меёбад ва даври дуюм бошад, аз якуми июл шурӯъ гардида, дар даҳаи сеюми моҳи ноябр ба охир мерасад ва зимни ҷамъбасту натиҷагирӣ сатҳи иҷрои талаботи ба давраҳои таҳсил пешбинишуда таҳлилу баррасӣ гардида, фаъолияти хизматии афсарону сарбозони тамоми зинаҳо мавриди санҷиш ва баҳогузорӣ қарор дода мешаванд.
Фаридун МАҲМАДАЛИЗОДА,
полковник