Чорабиниҳои даъвати шаҳрвандон ба хизмати ҳарбӣ дар шаҳру ноҳияҳои кишвар бомаром идома дорад.
Ҳамарӯза, ҷавонони зиёд ба комиссариатҳои ҳарбии маҳалли зисти хеш ҳозир гардида, омодагии худро баҳри иҷрои рисолати бузурги ватандорӣ иброз медоранд. Намунаи барҷастаи ин сафарбар гардидани се нафар даъватшаванда аз як оила дар ноҳияи Спитамени вилояти Суғд мебошад.
Аз даъват ва рафти хизмати ҳарбии онҳо аллакай ду ҳафта сипарӣ гардидааст. Дар ин давра бо дастури вазири мудофиаи Ҷумҳурии Тоҷикистон, генерал — полковник Собирзода Эмомалӣ гурӯҳи эҷодии Маркази матбуот ва иттилооти Вазорати мудофиа дар якҷоягӣ бо намояндагони Комисариати ҳарбии вилояти Суғд тасмим гирифтаанд, ки бо падару модари Ҳасан, Ҳусейн Абдуқодировҳо ва Абдуқодир Абдуқодиров аз наздик ошноӣ пайдо намуда, рӯзгори пурнишоту ифтихорбори ин оилаи хушбахту сарфарозро инъикос намоянд.
Воқеан, тарбия аз оила оғоз гардида, дар муҳити солими ҷомеа боз ҳам такмил меёбад. Аз сӯҳбати падару модар, пайвандону наздикон ва ҳамсояҳо, ки моро дар хонаи Абдуқодировҳо ҳамроҳӣ доштанд маълум буд, ки онҳо фарзандони худро дар рӯҳияи меҳнатдӯстӣ, эҳтироми байниҳамдигарӣ, дӯст доштану хизмат кардан ба халқу Ватан тарбия намуда, муқаддас шумурдану гиромӣ доштани ин марзи аҷдодиро меомӯзонанд. Маҳз, тарбияи хуб ва дар рӯҳияи худогоҳиву хештаншиносӣ ба камол расонидани фарзанд мебошад, ки имрӯз падру модар бо сари баланд ва ифтихори бузург ҳарф мезананд.
Ин оилаи хушбахту намуна барои аҳли ҷомеа дар деҳаи Саидқалъаи Ҷамомати деҳоти Истиқлоли ноҳияи Спитамен умр ба сар мебаранд. Рӯзгори аҳлонаву шарафмандона доранд ва ин ташаббуси неку оқилонаашон дар пайи тарбияи хуби оилавӣ боз ҳам намунаи олии ватандӯстӣ ва пайравӣ аз сиёсати сулҳпарваронаву ватандӯстонаи Пешвои миллат муҳтарам Эмомалӣ Раҳмон мебошад.
Пас аз хатми Муассисаи таҳсилоти миёнаи умумии рақами №14-и ноҳияи Спитамен, соли ҷорӣ Ҳасан ва Ҳусейн бо маслиҳати падару модар тасмим мегиранд аввал хизмати ҳарбиро ба ҷо оранд ва баъдан шомили яке аз муассисаҳои олии касбии мамлакат гардида, соҳибмаълумот шаванд. Абдуқодир бошад соҳиби маълумоти касбӣ аст. Амали ӯ воқеан сутуданист. Зеро дар роҳи хизмат ба халқу Ватан хост ҳамроҳу ҳамсафар ва ҳамхизмати бародаронаш бошад.
Ҳамин тавр, пас аз маслиҳату машварати падару модар се бародари хуштолеъ бо тартиби муқарраргардида ба Комиссариати ҳарбии ноҳияи Спитамен даъват карда мешаванд.
Бо ҳозир гардидан ба комиссариати ҳарбӣ онҳо ҳамаҷониба аз омӯзиши пешакӣ ва комиссияи тиббии ноҳиявӣ гузашта, ба нуқтаи ҷамъшавии вилоятӣ ҳозир мегарданд ва баъд аз омӯзишу санҷиши ҳамаҷониба аз ҷониби комиссияи даъватии вилоятӣ хоҳиши даъватшавандагон Абдуқодировҳо оиди дар як қисми ҳарбӣ хизмат намуданашон қонеъ гардонида мешавад ва онҳо баҳри ба ҷо овардани хизмати ҳатмии ҳарбӣ ба сафи Гвардияи миллии Ҷумҳурии Тоҷикистон сафарбар карда мешаванд.
Бо шомил гардидан ба қисми низомӣ се бародари навдаъватшуда ба хизмати ҳарбӣ номи наваскарро гирифтаанд. Чун либоси ифтихорбори низомӣ бар тан доранд, онҳо дарсу машғулиятҳои ибтидоии ҳарбиро аз худ менамоянд ва пас аз ёд намудани савганди ҳарбӣ дар оянда ҳамчун муҳофизони ҳақиқӣ ба Модар — Ватан содиқона хизмат менамоянд.
Он рӯз хонаводаи Абдуқодировҳо ба аёдати фарзандони худ ба қисми ҳарбии 051056-и Гвардияи миллӣ дар гарнизони Суғд омаданд. Волидайни сарбозон меҳмони ифтихории қисми ҳарбӣ буданд. Роҳбарият ва ҳама ҳайати шахсӣ ба падару модар барои чунин тарбияи хуб ва дар роҳи мардонагӣ таълим додани фарзандон аҳсан мехонданд.
Баъд аз зиёфати сарбозӣ аҳли хонаводаи Абдуқодировҳо бо роҳнамоии афсари самти корҳои сиёсӣ — тарбиявӣ бо худуд ва атрофи қисми ҳарбӣ шинос гардида, аз ҷойи хизмат, шароити буду бош, хобгоҳу ошхонаи сарбозӣ ва дигар шароиту имкониятҳои пешбинигардида ба хизмати ҳарбии фарзандони сарбозашон дидан намуданд.
Боқӣ ШАРИФӢ,
подполковник
