Мубориза бо терроризм ва экстремизм муборизаи муштараки кишварҳои дунёро тақозо менамояд»
Эмомалӣ РАҲМОН
Терроризм ва экстремизм, яке аз зуҳуроти номатлубу хатарзоест, ки ҷомеаи ҷаҳониро ба ташвиш овардааст. Ҳамасола дар самти пешгирӣ аз ин вабои аср, созмонҳои бонуфузи ҷаҳонӣ ва давлатҳои алоҳида барномаҳои гуногун тарҳрезӣ менамоянду дар байни мардум чорабиниҳои фаҳмондадиҳӣ гузаронида мешавад. Новобаста аз ин, вабои мазкур ба ҷойи кам шудан, амиқтару чуқуртар дар ҷаҳон реша давондааст. Ҷомеаи ҷаҳон аллакай эътироф намудаанд, ки террорист бераҳмтарину қотилтарин гурӯҳи ҷомеа аст. Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни яке аз суханрониҳои хеш изҳор дошта буданд, ки «Террорист Ватан, дин, мазҳаб ва миллат надорад».
Ҷумҳурии Тоҷикистон дар ҷаҳон ҳамчун мамлакати ҳиссагузор дар ҳалли масъалаҳои глобалӣ шинохта мешавад. Барои пешгирӣ аз терроризму экстремизм, Президенти мамлакат борҳо дар минбарҳои баланди созмонҳои бонуфуз пешниҳодҳои назаррас намудаанд, ки аз ҷониби ҷомеаи ҷаҳонӣ бо мамнуният пазируфта шудааст. Ҳамчунин, кӯшишҳои Пешвои миллат дар масъалаи сулҳи ҳамсоякишвари мо- Афғонистон шоистаи таҳсин аст.
Пешвои муаззами миллат, зимни ироаи Паёми имсолаи хеш ба Маҷлиси Олӣ, дар баробари дигар масъалаҳо, терроризм ва ҷалб гардидани ҷавонон ба гурӯҳҳои ифротиро мавриди таҳлил қарор доданд.
«Вазъи тағйирёбандаи ҷаҳони имрӯза ва хусусияти устувор пайдо намудани зуҳуроти хатарноки замони муосир, аз ҷумла, терроризму экстремизм, қочоқи силоҳ, гардиши ғайриқонунии маводи мухаддир, киберҷиноятҳо ва дигар ҷиноятҳои фаромиллӣ, ки башариятро ба ташвиш овардаанд, моро водор месозад, ки ба масъалаҳои таъмини амнияти кишварамон диққати аввалиндараҷа диҳем.
Зеро, пайравони созмонҳои террористиву экстремистӣ барои ноором сохтани вазъият дар ҷомеа ва тафриқаандозиву барангехтани низоъҳои диниву мазҳабӣ кӯшиш карда, барои гумроҳ кардани сокинони мамлакат, бахусус, ҷавонон ва ба созмонҳои манъшуда ҷалб намудани онҳо аз шабакаҳои интернетӣ васеъ истифода мебаранд»-, зикр гардид, дар Паёми имсола.
Пешвои миллат аз гаравидани ҷавонон ба ҳар гуна ҳизбу ҳаракатҳои иртиҷоӣ изҳори нигаронӣ намуданд. Зеро, ҷавонон насли ояндасози миллат ба шумор мераванд ва тарбияи дурусти онҳо дар роҳи хештаншиносӣ кафили ояндаи дурахшони давлату миллат аст.
Боиси таассуф ва нигаронист, ки хоинону нотавонбинон берун аз кишвар, бо мадади хоҷагони хориҷиашон ба сӯйи давлати Тоҷикистон сангпартоӣ мекунанд. Ҳарчанд ин амали онҳо шабеҳи аккоси саг аст, ки ҷуз нороҳат намудани гӯшҳо зиёне надорад, аммо ба ҳар ҳол мо бояд эҳтиёткориро аз даст надиҳем.
«Таъкид месозам, ки хоинони миллат ва хоҷаҳои хориҷии онҳо то ҳанӯз аз нақшаҳои нопоку ғаразноки худ, ки ибтидои солҳои 90-ум доштанд, даст накашидаанд. Онҳо то ба ҳол аз хориҷи кишвар бо тамоми роҳу воситаҳо кӯшиш карда истодаанд, ки ҷомеаи моро ноором сохта, фарҳангу мазҳаби бегонаро ба сари мардуми мо таҳмил кунанд»,-таъкид гардид дар Паёми имсолаи Сарвари давлат.
Дар ҳалли ин мушкилот низ Пешвои миллат такя ба мардум намуда, иброз доштанд, ки «Мардуми шарифи Тоҷикистон, махсусан ҷавонони бонангу номуси кишвар инро набояд фаромӯш кунанд ва бояд ҳамеша ҳушёру зирак бошанд».
Дар идомаи Паём Пешвои миллат, Прокуратураи генералиро вазифадор намуданд, ки лоиҳаи нави «Стратегияи миллии Ҷумҳурии Тоҷикистон оид ба муқовимат ба терроризм ва экстремизм барои солҳои 2021-2025»-ро таҳия ва ба баррасии Ҳукумат пешниҳод намояд.
Қобили зикр аст, ки шаҳрвандони худогоҳу хештаншиноси Тоҷикистон, зери роҳбарии Пешвои муаззами миллат, ҳамеша муқобили терроризму экстремизм буданд ва оянда низ кӯшиш ба харҷ хоҳанд дод, то дар ҳамбастагӣ бо созмонҳои бонуфузи ҷомеаи ҷаҳонӣ ин зуҳуроти номатлуб аз рӯйи ҷаҳон решакан шавад.
Шоҳин Шарифов
рӯзноманигор
