Зуҳуроти ниҳоят хатарноки асри нав – терроризм ва экстремизм, ки дар шароити торафт мураккаб гардидани вазъи ҷаҳони муосир густариш пайдо карда истодааст, истиқлолияти давлатҳои миллиро осебпазир намудааст. Намуна ва пайомадҳои чунин вазъро мо дар мисоли Сурия, Ироқ, Либия, Яман ва Афғонистон мебинем.
Мутаассифона, шаҳрвандони Ҷумҳурии Тоҷикистон низ ба доми гурӯҳҳои террористиву ифротӣ афтода, ҳаёти худро доғдор ва дар ин роҳи ғалат ҷон бохтанд. Таҳлилҳо нишон доданд, ки аксари шаҳрвандони мо, бахусус ҷавонон, аз роҳи нодониву ҷаҳолат ба чунин тирароҳ қадам гузошта, бархе ҳам қурбони ҳадафҳои гурӯҳҳои иртиҷоӣ шуданд. Қисме бо изҳори пушаймонӣ аз сафи гурӯҳҳои террористиву экстремистӣ ҷудо шуда, ба Ватан баргаштанд. Бар асоси қонунгузорӣ ин тоифаи фирефташуда афв гардида, ба зиндагии маъмулӣ баргаштанд. Аммо бархеи дигар, ки аз ҷониби гурӯҳҳои тундрав мағзшӯйи шуданд, ҳарчанд ба ҷазои аъмоли ғайриқонунӣ расида бошанд ҳам, боз чунин рафтори ғалату ғайриқонунӣ карданд.
Чунончи, Исломиддин Хайриддинов, зодаи шаҳри Панҷакент, таълимоти диниро дар айёми хурдӣ омӯхта соли 2008 расман аъзои равияи экстремистии динии «Ҷамоати таблиғ» (аз ҷониби Суди Олии Ҷумҳурии Тоҷикистон аз 30 марти соли 2006 бинобар ба амал баровардани фаъолияти экстремистӣ манъ шудааст) гардида, ҳамчун пайрави ин ҷамоат ба минтақаҳои гуногуни Тоҷикистон сафар намуда, ба даъват ва таблиғ машғул шудааст. Барои ин кирдораш бо ҳукми Коллегияи судӣ оид ба парвандаҳои ҷиноятии Суди Олии Ҷумҳурии Тоҷикистон бо моддаи 3073 қисми 2 Кодекси ҷиноятӣ ба муҳлати се сол аз озодӣ маҳрум гардид. Соли 2012 дар асоси Қонуни Ҷумҳурии Тоҷикистон «Дар бораи авф» аз ҷавобгарии ҷиноятӣ озод шуд. Вале мафкурааш аз банди андешаҳои ифротгароёна озод нашуда, ки боз даст ба тарғиби ақидаҳои носолим зад.
Исломиддин баъд аз афв шудану ба озодӣ баромадан ҳамчун аъзои фаъол ақидаҳои равияи динии ин ташкилоти экстремистиро тавассути шабакаҳои иҷтимоӣ ҷонибдорӣ намуда, бо чунин тарзу усул дигар шаҳрвандонро ба доми фиреби худ дароварда, бо ин роҳ мехост тарафдорони ташкилоти экстремистии ба ном «Ҷамоати таблиғ»-ро зиёд ва доираи фаъолияташро васеъ намояд. Вале, мисли он ки «бори каҷ ба манзил намерасад» ӯ низ ба аҳдофи зиддиқонуниаш нарасид. Ин навбат Исломиддин Хайриддинов бо ҳукми суди ноҳияи Исмоили Сомонӣ ба муҳлати 6 сол равонаи зиндон гардид.
Хушбахтона, дар пайи тадбирҳои муассири аз ҷониби давлат роҳандозӣ гардида, дар мисоли васеъ ба роҳ мондани корҳои тарғиботӣ алайҳи шомилшавии шаҳрвандон ба гурӯҳҳои ифротӣ ва эҷоди мафкураи зиддитеррористӣ гаравидани шаҳрвандони мо ба сафи ҷараёнҳои номатлуб кам гардидааст. Аммо, ёдовар шудан аз ин амали Исломиддин Хайриддиновро ба он мақсад зарур шумурдем, ки чунин қисмат ва рафтори ғайриқонунӣ бояд ба дигар пайравони ҷараёнҳои тундгаро намунаи ибрат гардад, то умри худро пушти панҷара дареғ насозанд. Балки ҳадафу ғаразҳои нопоки гурӯҳи таблиғгарони равияҳои террористиву экстремистиро дарк намуда, аз шомилшавӣ ба сафи онҳо худдорӣ намоянд ва дар фазои осудаи Ватани азизамон зиндагии хуше дошта бошанду дар пешрафти ин сарзамини биҳиштосо саҳми арзанда гузоранд.
Раҳматулло ХОЛОВ,
прокурори раёсати назорати қонунӣ
будани санадҳои судӣ оид ба
парвандаҳои ҷиноятии Прокуратураи генералӣ,
мушовири адлияи дараҷаи 1
