Яке аз самтҳои афзалиятноки фаъолияти кормандони мақомоти прокурорӣ, аз ҷумла Прокуратураи ҳарбӣ ин пеш аз ҳама роҳандозӣ намудани чорабиниҳои тағиботиву ташвиқотӣ оид ба пешгирии ҷинояту ҷинояткорӣ ва ташкили сӯҳбату вохӯриҳо бо хизматчиёни ҳарбии Қувваҳои Мусаллаҳи кишвар мебошад, ки зимни ин гуна чорабиниву машваратҳои корӣ мӯҳтавои қонуну санадҳои меъёрӣ-ҳуқуқии амалкунандаи соҳа ва дигар мавзӯъҳои мубрами рӯз мавриди таҳлилу баррасӣ қарор мегирад.
Дар доираи ин ҳадаф ва амалинамоии нақша-чорабиниҳои корӣ чанде қабл намояндагони Сарпрокуратураи ҳарбии ҷумҳурӣ ва масъулини Раёсат оид ба корҳои сиёсӣ-тарбиявии Вазорати мудофиаи мамлакат бо ҳайати шахсии афсарону курсантони Донишкадаи ҳарбии Вазорати мудофиа вохӯрӣ доир намуда, вобаста ба ҳолати иҷрои Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025, баромад намуданд.
Зимни баромади иштирокчиёни ҷамъомад қайд карда шуд, ки терроризму экстремизм ва дигар ҷиноятҳои муташаккили ҷиноӣ хатари воқеӣ ба амнияту суботи кишварҳои ҷаҳон мебошад. Зеро, ин падидаи номатлуб то ҳанӯз дар ҷомеа зери ниқобу ақидаҳои гуногуни ифротгароёна арзи ҳастӣ намуда, хатару таҳдидҳои нав ба нави амниятиро эҷод менамояд. Аз ин рӯ, ҷавонони моро зарур аст, ки фирефтаи ҳар гуна ақидаву мафкураҳои бегона нагардида, балки бо донишу ҷаҳонбинии сиёсӣ ва ҳуқуқиву маърифатии хеш дар пешгирӣ ва решакан намудани ин вабои аср саҳми арзанда гузоранд.
Ҳамзамон, дар рафти чорабинӣ аз ҷониби иштирокчиёни он доир ба татбиқи амалии Стратегияи давлатии муқовимат бо коррупсия дар Ҷумҳурии Тоҷикистон барои давраи то соли 2030 низ мавзӯву масъалаҳои гуногун мавриди омӯзиш қарор дода шуд.
Боқӣ ШАРИФОВ
