Чорабинии тантанавии идона ба муносибати таҷлил аз 30-юмин солгарди таъсисёбии Қувваҳои ҳарбӣ-ҳавоӣ дар пойгоҳи яке аз қисмҳои низомии ин навъи қӯшун бо садои Суруди миллӣ оғоз ёфт.
Дар чорабинӣ нахуст вобаста ба ғамхории доимӣ ва таваҷҷӯҳи бевоситаи Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон нисбат ба хизматчиёни ҳарбии Қувваҳои Мусаллаҳ, роҳбарияти Вазорати мудофиа суханронӣ карда, аз рӯзҳои аввали таъсисёбӣ ва роҳи тайнамудаи ин навъи қӯшуни Артиши миллӣ ва умуман бурду бохт ва дастоварду комёбиҳои Қувваҳои ҳарбӣ-ҳавоӣ ёдовар шуданд. Масъулин саҳми ҳайати шахсиро дар таҳкиму пойдории Истиқлоли давлатӣ ва омодагии доимии онҳоро баҳри ҳимояи марзу буми аҷдодӣ баланд арзёбӣ намуданд. Ҳамзамон зикр карда шуд, ки хушбахтона дар тӯли солҳои мавҷудият ва фаъолияти пурсамар, Қувваҳои ҳарбӣ-ҳавоӣ ва мудофиаи зидди ҳавоии кишвар ба як нерӯйи пуриқтидор табдил ёфта, имрӯз он қодир аст, сарҳадоти фазоии ҷумҳуриро назорат ва марзу буми заминии онро муҳофизат намояд.
Дар ҷараёни баргузории чорабинӣ инчунин ҳайати фармондеҳии ин навъи қӯшуни Қувваҳои Мусаллаҳ ва чанде аз собиқадорони соҳа баромад намуда, бо шукргузорӣ аз фазои сулҳу субот ва дастоварду комёбиҳои назарраси Тоҷикистони азиз ва рушду камоли артиши он дар ҳимояи ҳама музаффариятҳои даврони соҳибистиқлолӣ ибрози назар карданд.
Дар идомаи чорабинии ҷашнӣ бо фармоиши вазири мудофиа як қатор афсарону сарбозон барои хизматҳои шоёни таҳсинашон дар ҳифзи Ватан ва ҳимояи якпорчагии марзу буми он, бо рутбаҳои навбатии ҳарбӣ, медалу ифтихорнома ва дигар тӯҳфаҳои хотиравӣ сарфароз гардонида шуданд.
Зимнан, расми гузашти афсарону сарбозон ва умуман ҳайати шахсии дар ин чорабинӣ ширкат дошта аз назди минбар ва ҳайати меҳмонону собиқадорон яке аз ороишҳои асосии ҷамъомади тантанавӣ ба муносибати таҷлил иди касбии ҳавонавардони низомӣ гардид.
Ҳамчунин, дар интиҳои ҷамъомад аҳли ҳунар низ бо суруду оҳангҳои ватандӯстонаи хеш табъи ҳозиринро шод гардониданд.
Боқӣ ШАРИФОВ
