Ҳамасола дар саросари кишвар 24-уми ноябр ҳамчун Рӯзи Парчами давлатии Ҷумҳурии Тоҷикистон ботантана таҷлил мегардад. Ҷамъомади тантанавӣ ба ин муносибат дар Вазорати мудофиаи мамлакат чун оини доимии низомиён бо даровардани Парчами давлатӣ, Байрақи ҷангӣ ва бо садо додани Суруди миллӣ аз ҷониби иштирокчиён оғоз гардид.
Дар ин ҷамъомади бошукӯҳ ҳайати роҳбариву фармондеҳӣ, хизматчиёни ҳарбиву кормандони ғайринизомии Дастгоҳи марказии вазорат, Ситоди генералии Қувваҳои Мусаллаҳ ва намояндаи Маркази тадқиқоти стратегии назди Президенти Ҷумҳурии Тоҷикистон иштирок доштанд.
Дар оғози ҷамъомад зикр карда шуд, ки Парчами давлатӣ яке аз рамзҳои муҳими соҳибистиқлолӣ ва давлатдории муосири мо ба ҳисоб рафта, таҷассумгари асосҳои таърихӣ ва рамзҳои давлатдории гузаштаи тоҷикон, инчунин ифодакунандаи мақсаду маром ва орзуву ормонҳои тамоми мардуми Тоҷиистон мебошад. Парчами давлатӣ аз ҷумлаи рамзҳои муқаддасест, ки дар он истиқлол, ваҳдат ва осудагии миллату давлат таҷассум меёбад. Дар воқеъ, ин рамзи муқаддас нишони бақои миллат, давлат, иттиҳоду сарҷамъӣ ва яке аз беҳтарин воситаҳои тарбияи насли наврасу ҷавони кишвар дар рӯҳияи ватандорӣ, ифтихор аз миллати хеш ва ҳифзи арзишҳои волои таъриху фарҳанг маҳсуб меёбад.
Баромадкунандагон бо ёдоварӣ аз таърихи пурғановати ниёгонамон қайд карданд, ки аз аҳди бостон Парчам ифодагари маркази лашкар, мавқеи сарлашкар ва нерӯбахшу ҳидоятгари он ба пирӯзӣ ба шумор мерафт. Фориғ аз сафкашию ҳарб Парчами лашкар ба таври доимӣ аз ҷониби гурӯҳе аз сарбозон назорат ва ҳимоя мешуд, ки ин анъана то ба имрӯз боқист. Хушбахтона, дар замони Истиқлолияти давлатии Ҷумҳурии Тоҷикистон бо заҳмату талошҳои хастанопазири Пешвои миллат, муҳтарам Эмомалӣ Раҳмон мардуми мо соҳиби Артиши миллии худ гардид ва ин нерӯйи пуриқтидор имрӯз ҳимоятгари марзу буми Ватан ва тамоми дастоварду музаффариятҳои миллӣ мебошад. Бо шарафу ифтихор тамоми чорабиниву ҷамъомадҳои низомӣ бо даровардани Парчами давлатӣ оғоз мегардад. Ҳамчун рамзи пойдориву сарсупурдагӣ дар ҳамаи қисмҳои ҳарбӣ Байрақи ҷангӣ дар ҷойи муайян ва бо тартиби хос нигоҳ дошта мешавад.
Умуман, қайд кардан ба маврид аст, ки ба ифтихори Рӯзи Парчами давлатии Ҷумҳурии Тоҷикистон дар тамоми ҷузъу томи Вазорати мудофиаи мамлакат, муассисаҳои таълимии ҳарбӣ, қисму воҳидҳои алоҳидаи низомӣ, Раёсатҳои навъи қӯшуни Қувваҳои Мусаллаҳ ва қисмҳои ҳарбии тобеи онҳо ҷамъомади тантанавӣ, конфронсҳои илмӣ-назариявӣ, чорабиниҳои гуногуни сиёсӣ ва фарҳангиву варзишӣ баргузор гардиданд.
Дар охири ҷамъомад ба намояндагони дастаҳои варзишӣ, ки ба муносибати Рӯзи Парчами давлатии Ҷумҳурии Тоҷикистон дар мусобиқаҳои варзишӣ ғолиб гардида буданд, Ҷом ва ифтихорнома супорида шуд.
Боқӣ ШАРИФӢ
