Пойгоҳи Раёсати Қуваҳои ҳарбӣ–ҳавоӣ ва мудофиаи зиддтҳавоии Қувваҳои Мусаллаҳи Ҷумҳурии Тоҷикистон макони асосии баргузории чорабинии ҷашнии низомиёни кишвар, кормандони Вазорати мудофиа ва зерсохторҳои ин ниҳоди қудратӣ интихоб гардид.
Ба ин муносибат дар гӯшаҳои алоҳида дастархонҳои идонаи наврӯзӣ бо риояи анъанаҳои миллӣ ороста гардид, ки ҷолиби диққати ҳамагон буд.
Вазири мудофиаи Ҷумҳурии Тоҷикистон, генерал–полковник Собирзода Эмомалӣ ва дигар роҳбарияти Вазорати мудофиа ба базмгоҳи наврӯзӣ ворид гардида, аз дастархони идонаи аҳли кормандон бо завқи баланд дидан намуданд.
Воқеан ҳар гӯшаи базмгоҳи наврӯзӣ ба таври зебову назаррабо оро ёфта буд. Кадбонувони ҳунарманд аз раёсату шуъбаҳои вазорат, ба рӯйи хони наврӯзӣ таомҳои гуногуни миллӣ, нон ва маҳсулоти нонӣ, шириниҳои гуногун, ҳафтсину ҳафтшин, суманак, ҳунарҳои мардумӣ, либосҳои миллӣ ва дигар унсурҳои хоси Наврӯзи байналмилалиро ба намоиш гузоштанд.
Дар гӯшаи дигар бошад миёни иштирокчиёни чорабинии наврӯзӣ мусобиқаҳои гуногуни варзишӣ, аз қабили гуштини миллӣ, бандкашӣ ва дигар бозиҳои шавқовар доир карда шуд.
Роҳбарияти Вазорати мудофиа зимни баромади худ қайд намуд, ки маҳз дар даврони соҳибистиқлолии кишвари азизамон бо кушишу талошҳои бевомитаи Пешвои миллат, муҳтарам Эмомалӣ Раҳмон ва ҷонибдории як қатор кишварҳои дигар, Наврӯз мақоми байналмилалиро касб намуд ва ҳамасола онро дар ҷаҳон бо номи тоҷикии “Наврӯз” таҷлил менамоянд.
Қисмати барномаи фарҳангии омоданамудаи масъулини Вазорати мудофиа бо шеъру оҳанги сарояндаҳои шинохта ва устодони санъати тоҷик оғоз гардида, ҳамчунин ҳунармандони ансамбли «Шараф»-и Вазорати мудофиа бо суруду оҳангҳои баҳору наврӯз, модар ва Ватану ватандорӣ таъби хизматчиёни ҳарбӣ ва аъзои оилаҳои онҳоро болида гардониданд.
Дар маҷмуъ бо чунин шукуҳу шаҳомати хоса иди суннатии ниёгони худ, наврӯзи хуҷастапайро хизматчиёни ҳарбӣ дар пойгоҳҳои ҳамаи қисму воҳидҳои низомӣ таҷлил намуда, ҳамчун ҳимоятгари марзу буми аҷдодӣ анъанаву суннатҳои хоси онро пос медоранд.
