18-уми август ҳамасола дар мамлакат ҳамчун Рӯзи табибон бо шукӯҳу шаҳомати хоса ҷашн гирифта мешавад.
Бо ин мақсад, имрӯз дар толори Госпитали марказии ҳарбӣ бо иштироки кормандон ва масъулини нуқтаҳои тиббии ҷузъу томи Вазорати мудофиа чорабинии идона баргузор гардид, ки дар кори он ҳайати роҳбарии Вазорати мудофиа ва дигар масъулин ширкат намуда, табибони низомиро бо иди касбияшон табрику муборакбод намуданд.
Мавриди зикр аст, ки саҳми табибон, махсусан табибони низомӣ дар пешрафту инкишоф ва рушди саломатии миллат муҳим арзёбӣ мегардад. Маҳз заҳматҳои шабонарӯзии ин ворисони арзандаи Синои бузург аст, ки имрӯз тибби тоҷик аз ҳар ҷиҳат пешрафта асту имкониятҳои фаровони ташхису табобатро дорост.
Масъулин зимни суханронии худ аз солҳои душвор ва хизматҳои беминнати табибони низомӣ ёдовар шуда, онҳоро ба фаъолияти босифати минбаъда ва содиқ мондан дар савганди ёднамудаашон раҳнамун сохтанд.
Дар фарҷоми чорабинӣ як қатор табибони низомӣ, ки дар тӯли фаъолияти худ ба комёбиҳои назарраси соҳавӣ ноил гардидаанд, бо раҳматнома ва медалу ифтихорнома қадрдонӣ карда шудаанд.
Бояд қайд кард, ки Госпитали марказии ҳарбии Вазорати мудофиаи Ҷумҳурии Тоҷикистон бо Қарори Шӯрои вазирони Ҷумҳурии Тоҷикистон таҳти № 411 аз 23-юми августи соли 1993 дар пойгоҳи Госпитали иштирокчиён ва маъюбони Ҷанги Бузурги Ватанӣ таъсис ёфтааст ва имсол аз таъсисёбии он 30 сол сипарӣ мегардад.
Шоҳин ШАРИФОВ
