Ҷамъомади тантанавӣ ба муносибати таҷлил аз Рӯзи Президенти Ҷумҳурии Тоҷикистон, дар Вазорати мудофиа тибқи қавоиди доимии низомиён таҳти навои Оркестри ҳарбӣ-нафасӣ, бо ворид намудани Парчами давлатӣ, Байрақи ҷангӣ ва баъд аз садо додани Суруди миллӣ оғоз гардид.
Дар ҷамъомад роҳбарияти Вазорати мудофиа ва муовини раиси ҳизби халқии демократии Тоҷикистон дар назди хизматчиёни ҳарбии сатҳу зинаҳои гуногун суханронӣ намуда, доир ба аҳамияти ин санаи бисёр муҳими таърихӣ ва нақши Пешвои миллат, муҳтарам Эмомалӣ Раҳмон дар бунёди давлати навини тоҷикон ибрози андеша карданд. Дар ин радиф қайд карда шуд, ки дар баробари ба даст овардани Истиқлоли давлатӣ мардуми хуштолеъи Тоҷикистони азизро роҳбари раиятпарвару ватандӯсте насиб гардонид, ки бо такя ба хиради халқи сулҳпарвару соҳибтамаддунаш ва кирдору амалҳои некаш, ба муноқишаҳои дохили хотима бахшад, мардуми парешонгаштаро муттаҳид намояд, сулҳу ваҳдатро пойдор нигаҳ дорад, тамоми рукнҳои давлатдориро барқарор сохта, вазъи сиёсӣ, иҷтимоиву иқтисодӣ дар кишвар, худшиносиву худогоҳӣ, ҳисси ватандӯстиву ватанпарварии тамоми табақаҳои ҷомеаро боз ҳам таҳкиму тақвият бахшид.
Бо ёдоварӣ аз таъриху тамаддуни давлатдории кишварҳои қудратманди минтақа ва ҷаҳон, зикр карда шуд, ки ҳар як миллату халқият барои ноил гардидан ба Истиқлолияти комил, давлату ҷомеа, пешрафту тараққиёт ва иттиҳоду сарҷамъии миллату халқашон, аз нерӯву тавоноии шахсиятҳои таърихиву барҷаста, ба мисли Пешвои миллати тоҷикон, муҳтарам Эмомалӣ Раҳмон, ки дар марҳалаҳои бисёр мураккабу ҳассос ба арсаи сиёсат омада, суботу осоиштагӣ ва роҳи рушди минбаъдаи мамлакати худро муайян намудаанд, истифода менамоянд ва чунин шахсиятҳо дар болоравии обрӯву мақоми давлатдориашон нақши муҳим мебозанд.
Дар охири ҷамъомад ба намояндагони дастаҳои варзишӣ, ки ба муносибати Рӯзи Президенти Ҷумҳурии Тоҷикистон дар мусобиқаи тирпарронӣ ғолиб гардида буданд, Ҷом ва ифтихорнома супорида шуд.
Қобили зикр аст, ки ба муносибати таҷлил аз Рӯзи Президенти Ҷумҳурии Тоҷикистон, дар “Кохи афсарон”-и Вазорати мудофиа, муассисаҳои таълимии ҳарбӣ, навъи қӯшунҳо ва дар дигар ҷузъу томи ин ниҳоди қудратии мамлакат низ конференсияҳои ҷумҳуриявии илмӣ-назариявӣ ва чорабиниҳои сиёсиву фарҳангӣ баргузор гардиданд, ки дар он намояндагони сохторҳои қудратии мамлакат, олимону сиёсатмадорони маъруфи ҷумҳурӣ ва аҳли зиёи кишвар иштироку суханронӣ карда, нақши Президенти Ҷумҳурии Тоҷикистон муҳтарам Эмомалӣ Раҳмонро дар бунёди давлати навини тоҷикон, таҳкиму тақвият бахшидани Артиши миллии он ва рушди давлатдорӣ баланд арзёбӣ намуданд.
Дар ҳама ҷамъомаду чорабиниҳои тантанавӣ, бо эътимоду боварӣ ва изҳори сипосу миннатдорӣ таъкид карда шуд, ки мо хизматчиёни ҳарбии Артиши миллӣ, аз сарбози қаторӣ то афсарони олирутба ба савганди ёдкардаи хеш доимо содиқ монда, вазифаи муқаддаси худро дар назди ҳалқу Ватан ва сарвари давлат бо ҳисси ифтихору масъулияти баланд адо хоҳем кард.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
