Ба муносибати Рӯзи Президенти Ҷумҳурии Тоҷикистон дар Вазорати мудофиаи мамлакат, муассисаҳои таълимии ҳарбӣ ва қисму воҳидҳои низомии Қувваҳои Мусаллаҳи Ҷумҳурии Тоҷикистон бо иштироки ҳайатҳои роҳбариву фармондеҳӣ, намояндагони сохторҳои қудратии мамлакат ва афсарону сарбозони ҷузъу томи Артиши миллӣ як қатор ҷамъомаду чорабиниҳои тантанавӣ ва конфронсҳои илмӣ-назариявии сатҳи ҷумҳуриявӣ баргузор гардиданд.
Дар робита ба ин ҷамъомади тантанавӣ ба муносибати таҷлил аз Рӯзи Президенти Ҷумҳурии Тоҷикистон дар Вазорати мудофиа тибқи қавоиди доимии низомиён бо ворид намудани Парчами давлатӣ, Байрақи ҷангӣ ва баъд аз садо додани Суруди миллӣ оғоз гардид.
Дар ҷамъомад роҳбарияти Вазорати мудофиа ва намояндаи Маркази татқиқоти стратегии назди Президенти Ҷумҳурии Тоҷикистон дар назди хизматчиёни ҳарбии сатҳу зинаҳои гуногун суханронӣ намуда, доир ба аҳамияти ин санаи бисёр муҳими таърихӣ ва нақши Пешвои миллат, муҳтарам Эмомалӣ Раҳмон дар бунёди давлати навини тоҷикон ибрози андеша карданд. Дар ин радиф қайд карда шуд, ки дар баробари ба даст овардани Истиқлоли давлатӣ, мардуми хуштолеъи Тоҷикистони азизро роҳбари раиятпарвару ватандӯсте насиб гардонид, ки бо такя ба хиради халқи сулҳпарвару соҳибтамаддунаш ва кирдору амалҳои некаш, ба муноқишаҳои дохилӣ хотима бахшид, мардуми парешонгаштаро муттаҳид намуд, сулҳу ваҳдатро пойдор нигаҳ дошт, тамоми рукнҳои давлатдориро барқарор сохта, вазъи сиёсӣ, иҷтимоиву иқтисодӣ дар кишвар, худшуносиву худогоҳӣ, ҳисси ватандӯстиву ватанпарварии тамоми табақаҳои ҷомеаро боз ҳам таҳкиму тақвият бахшид.
Бо ёдоварӣ аз таъриху тамаддуни давлатдории кишварҳои қудратманди минтақа ва ҷаҳон, зикр карда шуд, ки ҳар як миллату халқият барои ноил гардидан ба Истиқлолияти комил, давлату ҷомеа, пешрафту тарақиёт ва иттиҳоду сарҷамии миллату халқашон, аз нерӯву тавоноии шахсиятҳои таърихиву барҷаста, ба мисли Пешвои миллати тоҷикон, муҳтарам Эмомалӣ Раҳмон, ки дар марҳаллаҳои бисёр мураккабу ҳассос ба арсаи сиёсат омада, суботу осоиштагӣ ва роҳи рушди минбаъдаи мамлакати худро муайян намудаанд, истифода менамоянд ва чунин шахсиятҳо дар болоравии обрӯву мақоми давлатдориашон нақши муҳим мебозанд.
Ба муносибати таҷлил аз Рӯзи Президенти Ҷумҳурии Тоҷикистон, дар “Кохи афсарон”-и Вазорати мудофиа ва Донишкадаи ҳарбӣ низ дар мавзӯи «Президенти Ҷумҳурии Тоҷикистон, мӯҳтарам Эмомалӣ Раҳмон Асосгузори Артиши миллӣ» ва «Нақши мактаби сиёсии Пешвои миллат, мӯҳтарам Эмомалӣ Раҳмон дар рушди давлатдорӣ» конференсияҳои ҷумҳуриявии илмӣ-назариявӣ баргузор гардиданд, ки дар он намояндагони сохторҳои қудратии мамлакат, олимону сиёсатмадорони маъруфи ҷумҳурӣ ва аҳли зиёи кишвар иштироку суханронӣ карда, нақши Президенти Ҷумҳурии Тоҷикистон, мӯҳтарам Эмомалӣ Раҳмонро дар бунёди давлати навини тоҷикон ва таҳкиму тақвият бахшидани Артиши миллии он баланд арзёбӣ намуданд.
Дар ҳама ҷамъомаду чорабиниҳои тантанавӣ, бо эътимоду боварӣ ва изҳори сипосу миннатдорӣ таъкид карда шуд, ки мо хизматчиёни ҳарбии Артиши миллӣ, аз сарбози қаторӣ то афсарони олирутба ба савганди ёдкардаи хеш доимо содиқ монда, вазифаи муқаддаси худро дар назди ҳалқу Ватан ва Сарвари давлат бо ҳисси ифтихору масъулияти баланд адо хоҳем кард.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
