Ҷамъомади тантанавӣ ба муносибати Рӯзи Парчами давлатии Ҷумҳурии Тоҷикистон дар Вазорати мудофиаи мамлакат бо даровардани Парчами давлатӣ, Байрақи ҷангӣ ва бо садо додани Суруди миллӣ аз ҷониби иштирокчиён оғоз гардид.
Дар ин ҷамъомади бошукӯҳ ҳайати роҳбариву фармондеҳӣ, хизматчиёни ҳарбиву кормандони ғайринизомии Дастгоҳи марказии вазорат ва Ситоди генералии Қувваҳои Мусаллаҳ иштирок доштанд. Дар ҷараёни баргузории ҷамъомад масъулини Вазорати мудофиа ва намояндаи Академияи миллии илмҳои Тоҷикистон ҳайати дар толор буда ва дар симои онҳо тамоми хизматчиёни ҳарбии Артиши миллиро ба солгарди навбатии Рӯзи Парчами давлатӣ шодбош гуфта, зимнан аз таърихи парчамдории ниёгонамон ва аҳамияти бузурги ин муқаддасот дар низоми давлатдории мустақили миллӣ ёдоварӣ намуданд.
Дар ҷамъомад зикр карда шуд, ки Парчами давлатӣ нишон аз пойдорӣ ва соҳибихтиёрии давлат аст. Аз ин рӯ арҷгузорӣ нисбат ба он, муқаддас шуморидан ва эҳтиром гузоштан вазифаи ҳар як фарди ҷомеа, алалхусус афсарону сарбозони Артиши миллӣ мебошад. Ҳамчунин қайд гардид, ки мувофиқи Оинномаҳои умумиҳарбии Қувваҳои Мусаллаҳ дар қисму воҳидҳои низомӣ низ байрақи ҷангӣ нигоҳ дошта мешавад ва ҳар як хизматчии ҳарбӣ ҳамчун нишони садоқату вафодорӣ ба халқу Ватани хеш байрақи ҷангии қисми ҳарбии худро эҳтиром намуда, қасам ёд мекунад, ки вазифаҳои хизматиашро мардонавор ва бо сари баланд ба ҷо меорад.
“Парчами давлатӣ рамзи озодӣ ва соҳибистиқлолии миллат” таҳти ҳамин унвон дар Донишкадаи ҳарбии Вазорати мудофиа бошад, Конфренсияи илмӣ-назариявӣ доир гардид, ки дар рафти он афсарону устодони ин муассисаи таълимии низомӣ маърӯзаҳои гуногунро дар мавзӯъҳои “Парчами давлатӣ-рамзи ҳастии миллат”, “Парчам рамзи сарбаландию шуҷоатмандии миллати тоҷик” ва “Ҷойгоҳи Тоҷикистон дар низоми муносибатҳои байналхалқӣ” пешниҳоди ҳайати шахсӣ намуданд. Таъкид карда шуд, ки воқеан, Парчами давлатӣ яке аз рамзҳои хоси давлатдории мустақили миллӣ буда, эҳтиром ва арҷгузорӣ нисбат ба ин арзиши олӣ вазифаи ҳар як фарди худогоҳу хештаншиноси кишвар мебошад.
Умуман, қайд кардан ба маврид аст, ки ба ифтихори Рӯзи Парчами давлатии Ҷумҳурии Тоҷикистон дар тамоми ҷузъу томи Вазорати мудофиаи мамлакат, муассисаҳои таълимии ҳарбӣ, қисму воҳидҳои алоҳидаи низомӣ, Раёсатҳои навъи қӯшуни Қувваҳои Мусаллаҳ ва қисмҳои ҳарбии тобеи онҳо ҷамъомади тантанавӣ, конфронсҳои илмӣ-назариявӣ, чорабиниҳои гуногуни сиёсӣ ва фарҳангиву варзишӣ баргузор гардиданд.
Боқӣ ШАРИФОВ
