Ҷамъомади бошукӯҳи идона ба муносибати таҷлил аз “Рӯзи Модар” дар толори асосии Вазорати мудофиаи Ҷумҳурии Тоҷикистон бо тамошои намоиши видеоӣ, ки бозгӯйи хизматҳои занону бонувони низомӣ ва ҷасорати гурдофаридони ин сохтори қудратӣ буд, шуруъ гардид.
Доир ба ғамхорӣ ва таваҷҷуҳи доимии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбат ба низомиён, саҳми модарон ва занону бонувон низомӣ дар соҳаҳои мухталифи Қувваҳои Мусаллаҳ, вазири мудофиаи мамлакат, генерал–полковник Собирзода Эмомалӣ дар сухани табрикотии худ қайд намуд.
Аз ҷумла зикр гардид, ки дар замони соҳибистиқлолӣ аз тарафи Ҳукумати кишвар ҷиҳати баланд бардоштани мақому манзалати занон дар ҷомеа тадбирҳои муҳиму саривақтӣ андешида мешавад. Дар ин доира давоми солҳои охир дар Вазорати мудофиа ва сохторҳои зертобеи он ба вазифаҳои роҳбарикунанда ҷалб кардани занҳои қобилиятноку ташкилотчӣ зиёд гардида, инчунин шумораи намояндагии онҳо дар қисму воҳидҳои ҳарбӣ низ афзоиш меёбад.
Дар идома қайд карда шуд, ки Модар барои ҳар як инсон шахси азиз ва муътабар буда, муқаддастарин маҳфум, яъне Ватанро бо Модар баробар ва ҳамрадиф медонанд. Ин ду маҳфум барои ҳар як инсони соҳибқалбу соҳибватан арзишу манзалати олӣ доранд.
Воқеан, занону бонувони низомӣ рисолати хешро дар қатори мардон, ҷиҳати рушду нумуи Қувваҳои мусаллаҳ ва таълиму тарбияи сарбозони ҷавон иҷро намуда, саҳми худро дар баланд бардоштани қудрати дифоии кишвар садоқатимандона мегузоранд.
Дар ҷараёни чорабинии идона аз ҷониби роҳбарияти Вазорати мудофиа занону бонувони ин сохтори муҳими низомии кишвар, бо тӯхфаҳои хотиравӣ қадрдонӣ карда шуданд. Ҳамзамон ба занону бонувоне, ки дар мусобиқаҳои варзишии бахшида ба “Рӯзи модар” ширкати фаъолона доштанд, бо ба даст овардани ҷойҳои ифтихорӣ соҳиби ҷоми вазири мудофиа, диплом ва мукофотҳои пулӣ гардиданд.
Дар қисмати фарҳангии ҷамъомад ҳунармандони ансамбли «Шараф»-и Вазорати мудофиа дар якҷоягӣ бо дигар санъаткорони шинохтаи кишвар барномаи ҷолиби консертиро бо суруду таронаҳо дар васф ва ситоиши зан — модар пешниҳоди ҳозирин гардониданд.
