Имсол бори нахуст дар асоси Қонуни Ҷумҳурии Тоҷикистон “Дар бораи рӯзҳои ид” санаи 24-уми октябр дар сартосари кишвар ҳамчун “Рӯзи Иттифоқҳои касаба” таҷлил карда мешавад. Бояд қайд намуд, ки таҷлили “Рӯзи Итифоқҳои касаба” бо ташаббуси бевоситаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон алоқаманд аст.
Бо ин мақсад имрӯз дар толори “Кохи афсарон”-и Вазорати мудофиа низ чорабинӣ гузаронида шуд, ки дар он сардори Раёсат оид ба корҳои сиёсӣ-тарбиявӣ, раиси Кумитаи иттифоқи касаби вазорат, хизматчиёни давлатӣ-маъмурӣ ва дигар аъзоёни иттифоқи касаба иштирок намуданд.
Ҳайати баромадкунандагон зимни суханронии худ ҳамаи аъзоёни иттифоқро бо ин ҷашн самимона табрик намуда, зикр карданд, ки Иттифоқи касаба ҳамчун ташкилоти оммавӣ рисолати хешро дар ҳифзу ҳимояи дастовардҳои Истиқлоли давлатӣ, таҳкими сулҳу субот дар саросари кишвар, ваҳдати миллӣ, ҳифзи манфиатҳои иҷтимоию иқтисодии аъзои Иттифоқи касаба ва фароҳам овардани шароити арзандаи зиндагӣ барои ҳар як корманд анҷом дода истодааст.
Дар фарҷоми чорабинӣ як қатор аъзоёни Иттифоқи касаба бо медали ҷашнии “30-солагии Қувваҳои Мусаллаҳи Ҷумҳурии Тоҷикистон” ва Ифтихорномаю Сипосномаи Вазорати мудофиа сарфароз гардонида шуданд.
Шоҳин ШАРИФОВ
