Ҷамъомади тантанавӣ ба муносибати Рӯзи забони давлатӣ дар Вазорати мудофиаи мамлакат бо даровардани Парчами давлатии Ҷумҳурии Тоҷикистон, Байрақи ҷангӣ ба толори баргузории чорабинӣ ва бо садои Суруди миллӣ таҳти навои Оркестри ҳарбӣ-нафасӣ оғоз гардид.
Дар оғоз вобаста ба саҳми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рушду ташаккули забони давлатӣ ва татбиқи сиёсати ҳадафмандонаи Ҳукумат дар ин самт, масъулини Вазорати мудофиа ва намояндаи Иттифоқи нависандагони Тоҷикистон дар назди ҳайати шахсии Дастгоҳи марказии вазорат, Ситоди генералии Қувваҳои Мусаллаҳ ва кафедраҳои ҳарбии назди муассисаҳои олии касбии мамлакат баромад намуда, қайд карданд, ки моҳият ва муҳимтарин масъалаҳои сиёсати забон дар гузориш ва баромадҳои Сарвари давлат иброз гаштаанд.
Тавре таъкид шуд, асари бунёдии Президенти Ҷумҳурии Тоҷикистон муҳтарам Эмомалӣ Раҳмон “Забони миллат-ҳастии миллат” тадқиқоти марҳилавие гардид, ки ба бисёр муаммоҳои баҳснок ва ҳалталаби амалкарди забони тоҷикӣ ва таърихи таҳаввули он рӯшанӣ андохт.
Маҳз, ҳамин омилҳо буданд, ки дар Тоҷикистон падидаи нодири сиёсию фарҳангӣ ва илмӣ-сиёсии забон комилан ташаккул ёфт.
Дар идома зикр гардид, ки забон арзишмандтарин муқаддасоти миллат ва ҳастии ҳар як давлат мебошад. Забон мояи ифтихор ва далели баҳснопазири куҳанбунёд будани миллат ба ҳисоб рафта, яке аз рукнҳои муҳими давлатдорӣ маҳсуб меёбад. Забони мо нишон аз таъриху фарҳанги ниёгон ва сарчашмаи мероси пурғановати гузаштагонамон мебошад.
Чуноне, Пешвои миллат муҳтарам Эмомалӣ Раҳмон қайд менамоянд: “Танҳо забон аст, ки дар ҳама давру замон таърихи воқеӣ ва ростини миллатро дар ҳофизаи худ нигоҳ медорад”.
Ҳамин тавр, бо таъкид иброз карда шуд, ки дар ҳама давру замон забони давлатӣ ҳамчун рукни давлатдорӣ буда, сарчашмаи асосии Истиқлоли миллӣ ва омили ташаккули инсоният маҳсуб дониста мешавад.
Боқӣ ШАРИФӢ,
подполковник
