Дар Вазорати мудофиаи Ҷумҳурии Тоҷикистон бахшида ба Рӯзи Ваҳдати миллӣ чорабинии тантанавӣ баргузор гардид. Дар он роҳбарияти Вазорати мудофиа, раиси Кумитаи иҷроияи Ҳаракати ваҳдати миллӣ ва эҳёи Тоҷикистон, ҳайати шахсии дастгоҳи марказии вазорат ва Ситоди генералии Қувваҳои Мусаллаҳ иштирок намуданд.
Вазири мудофиаи Ҷумҳурии Тоҷикистон, генерал-полковник Эмомалӣ Собирзода дар суханронии худ иброз дошт, ки бо сиёсати хирадмандонаву инсондӯстонаи Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ, генерали Артиш муҳтарам Эмомалӣ Раҳмон ва садоқати хизматчиёни ҳарбӣ дар саросари кишвар ваҳдати воқеӣ таъмин гардида, Артиши миллӣ дар баробари дигар сохторҳои қудратӣ барои татбиқи Конститутсия ва қарорҳои Ҳукумати Ҷумҳурии Тоҷикистон саҳми арзанда гузоштааст. Таъкид шуд, ки дар ҷараёни музокирот ва барқарорсозии сулҳ маҳз мавҷудияти Артиши миллӣ кафили таъмини амнияти мардуми осоишта буд.
Зимни чорабинӣ таъкид гардид, ки дар таърихи ҳар як миллат ва давлати соҳибистиқлол Артиш ё Қувваҳои Мусаллаҳ на танҳо кафили амният ва ҳифзи марзу буми кишвар, балки пояи устувори ваҳдати миллӣ ва якпорчагии ҷомеа ба ҳисоб меравад. Дар Тоҷикистони соҳибистиқлол низ Артиши миллӣ дар таҳкими ваҳдати миллӣ, пойдории давлатдорӣ ва ҳифзи арзишҳои миллӣ нақши назаррас ва сарнавиштсоз дорад.
Дар идомаи ҷамъомад раиси Кумитаи иҷроияи Ҳаракати ваҳдати миллӣ ва эҳёи Тоҷикистон Рудобаи Мукаррам иброз дошт, ки аз рӯзҳои аввали таъсисёбӣ Артиши миллӣ ҳамчун сутуни боэътимоди давлатдорӣ дар таҳкими суботу оромӣ, ваҳдати миллӣ ва фазои сулҳу созиш саҳми бевосита гузоштааст. Ба гуфтаи ӯ, маҳз бо садоқатмандии афсарону сарбозони Қувваҳои Мусаллаҳ ва таҳти роҳбарии Пешвои муаззами миллат мардуми Тоҷикистон тавонистанд 27 июни соли 1997 Созишномаи умумии истиқрори сулҳ ва ризоияти миллиро ба имзо расонида, дар роҳи бунёди давлати ҳуқуқбунёд, дунявӣ ва демократӣ қадамҳои устувор гузоранд.
Ҳамчунин зикр гардид, ки бо дарназардошти аҳамияти бузурги ваҳдати миллӣ барои ҷомеа, ҳифзу гиромидошти он, бедор намудани ҳисси ватандӯстӣ ва ҳифзи арзишҳои милливу давлатӣ дар байни афсарону сарбозони Қувваҳои Мусаллаҳи Ҷумҳурии Тоҷикистон мактаби ҷасорату мардонагии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон пайваста омӯзонида мешавад. Ин раванд ҳамчун намунаи равшани татбиқи ваҳдати воқеии миллӣ дар сафи Қувваҳои Мусаллаҳ арзёбӣ гардид.
Дар фарҷоми чорабинӣ дастаҳои варзишии ҷузъу томҳои ҳарбии Вазорати мудофиа, ки дар мусобиқаҳои варзишии бахшида ба Рӯзи Ваҳдати миллӣ маҳорати баланд нишон дода, сазовори ҷойҳои ифтихорӣ гардида буданд, бо ҷоми мусобиқа, сипоснома ва дигар туҳфаҳои хотиравӣ сарфароз гардонида шуданд
