Таҷлили Наврӯзи хуҷастапай, ҷашни бостонии мардуми аҷам бо иштироки ҳайатҳои роҳбариву фармондеҳии Вазорати мудофиаи мамлакат, дар толори асосии ин ниҳоди қудратӣ, бо шукӯҳи хосса доир карда шуд.
Дар оғози чорабинии ҷашнӣ доир ба иқдому ташаббусҳои созанда ва саҳми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомали Раҳмон вобаста ба ҷаҳонишавии Наврӯзи хуҷастапай, вазири мудофиаи мамлакат суханронӣ карда, ҳозирин ва дар симои онҳо тамоми муҳофизони ин марзу буми аҷдодиро бо ҷашни Наврӯзи оламафрӯз табрику таҳният кард ва ба онҳо дар хизмати масъулиятноку пурифтихорашон барору комёбиҳоро таманно намуд. Тавре қайд карда шуд, Наврӯз рӯзи пирӯзист, пирӯзии нав бар куҳна, нур бар торикӣ, ростӣ бар дурӯғ ва як расми хуҷастаи фарҳангиест, ки наслҳои имрӯзаро аз як сӯ ба таърих ва аз тарафи дигар ба ояндаи умедбахш мепайвандад ва бо тамоми расму оинҳои хоси худ аз ягонагии маънавӣ ва тамадуни бойи таърихии миллати тоҷик гувоҳӣ медиҳад.
Лозим ба ёдоварист, ки дар арафаи таҷлил аз Наврӯзи байналмилалӣ, байни хизматчиёни ҳарбии Дастгоҳи марказии Вазорати мудофиа, Ситоди генералии Қувваҳои Мусаллаҳ, навъи қӯшунҳо, муассисаҳои таълимии ҳарбӣ ва дигар ҷузъу том, аз рӯйи намудҳои гуногуни варзиш мусобиқа баргузор гардида буд, ки дар идомаи ҷамъомади тантанавӣ он натиҷагирӣ ва ғолибони мусобиқа бо Ҷому ифтихорномаҳо сарфароз гардонида шуданд.
Дар охир ҳунармандони ансамбли «Шараф»-и Шуъбаи фарҳанги Маркази матбут ва иттилооти Вазорати мудофиаи мамлакат бо барномаи рангини консертӣ баромад намуда, ба чорабинии фарҳангӣ-фароғатии наврӯзии низомиёни мамлакат шукӯҳи хосса зам намуданд.
Қобили зикр аст, ки базмҳои идонаи наврӯзӣ дар тамоми муассисаҳои таълимии ҳарбӣ, қисму воҳидҳои низомӣ ва дигар ҷузъу томи тобеи ин ниҳоди қудратӣ, бо оростани дастурхони идонаи наврӯзӣ, ташкилу баргузории барномаҳои рангини фарҳангиву фароғатӣ, қироати шеъру суруд, мусобиқаҳои гуногуни варзишӣ, ба мислӣ бандкашиву гуштини миллӣ ва дигар чорабиниҳои фарҳангиву фароғатӣ хеле хотирмону фараҳбахш ҷашн гирифта шуд.
Фаридун МАҲМАДАЛИЗОДА,
сардори Маркази матбуот ва иттилооти
Вазорати мудофиаи Ҷумҳурии Тоҷикистон,
полковник
