Ҷашни бузурги Истиқлоли давлатӣ, ки ҳамасола дар саросари кишвар ба таври хотирмону самимӣ ва бо шукӯҳу шаҳомати хоса таҷлил карда мешавад, 33-юмин солгарди ин санаи муҳиму сарнавиштсози миллиро хизматчиёни ҳарбии Қувваҳои Мусаллаҳи мамлакат низ дар баробари мардуми шарифи Тоҷикистон бо омодагии ҳамаҷониба ва рӯҳияи баланди идона таҷлил намуданд.
Таҷлили ин санаи фархунда дар Дастгоҳи марказии Вазорати мудофиаи Ҷумҳурии Тоҷикистон чун дигар ҷамъомадҳои низомиёни кишвар бо риояи муқаррароти оинномавӣ ва басо ҳам самимиву хотирмон сурат гирифт. Котиби Шӯрои амнияти ҷумҳурӣ ва роҳбарияти Вазорати мудофиа дар назди ҳайати шахсӣ суханронӣ намуда, қайд карданд, ки Истиқлоли давлатӣ бузургтарин ва пурарзиштарин дастоварди таърихии мардуми Тоҷикистон ба ҳисоб рафта, бо ба даст овардани ин музаффарият миллати тоҷик баъди ҳазор соли таърих дар интиҳои қарни 20 дубора ба давлатдории мустақили миллӣ ноил гардид. Имрӯз, ки ҳифзи Ватан, сулҳу субот ва осоиштагии мардуми сарзаминамон-ҷавҳари асосии ҷомеаи демократӣ ва ҳуқуқбунёдро ташкил медиҳад, мо бояд бо садоқат ва шарафи беназир ба халқу Ватан хизмат намоем, то ки мардуми шарифи Тоҷикистон ифтихорманд аз артиши қобили муҳофизати марзу буми кишвар ва Истиқлоли давлатии хеш бошанд!
Ҳамин тавр, баромадкунандагон Истиқлолу озодиро сарманшаи ҳамаи хушбахтиҳо, амалигардии орзуву ормонҳои миллӣ ва роҳи расидан ба ҳадафҳои бузургу созанда маънидод карда, қайд намуданд, ки Қувваҳои Мусаллаҳ ҳамчун рукни асосии давлатдории мустақили миллӣ ва такягоҳу пуштибони Истиқлоли давлатӣ дар таъмини амнияту субот ва ҳифзи дастовардҳои замони соҳибистиқлолӣ нақши асосӣ дорад.
Баъд аз суханрониву табрикотҳои самимӣ дар қисмати дигари ҷамъомади тантанавӣ барои хизматҳои софдилона, саҳмгузорӣ дар суботу оромии ҷомеа ва ба муносибати 33-юмин солгарди Итиқлоли давлатӣ як қатор хизматчиёни ҳарбӣ ва кормандони ғайринизомии Вазорати мудофиа ва сохторҳои зертобеи он аз номи Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон бо мукофотҳои давлатӣ сарфароз гардонида шуданд.
Маврид ба зикри хос аст, ки низомиёни кишвар ҷашни фархундаву пурифтихори соҳибистиқлолии меҳани азизи хешро дар пойгоҳи тамоми ҷузъу томи ҳарбии Қувваҳои Мусаллаҳи Ҷумҳурии Тоҷикистон дар заминаи ташкили чорабиниҳои фарҳангиву фароғатӣ, варзишӣ, конференсияҳои илмӣ-амалӣ ва дар маҷмӯъ бо рӯҳияи баланди идона таҷлил менамоянд.
Боқӣ ШАРИФӢ,
подполковник
