Дар идомаи тантанаҳои ҷашнӣ ба муносибати 35-солагии Истиқлоли давлатии Ҷумҳурии Тоҷикистон дар пойгоҳи Раёсати Қувваҳои ҳарбӣ-ҳавоӣ ва мудофиаи зиддиҳавоии Қувваҳои Мусаллаҳи Ҷумҳурии Тоҷикистон таҳти унвони «35 соли созандагӣ, дастовардҳо, масъулият ва дурнамои рушди Тоҷикистони соҳибистиқлол» ҳамоиши тантанавӣ баргузор гардид
Дар чорабинӣ вакили Маҷлиси намояндагони Маҷлиси Олии Ҷумҳурии Тоҷикистон Дилноза Аҳмадзода, ҳайати роҳбарӣ, афсарону сарбозон ва собиқадорони Қувваҳои ҳарбӣ-ҳавоӣ ва мудофиаи зиддиҳавоӣ иштирок намуданд
Зимни суханрониҳо таъкид гардид, ки Истиқлоли давлатӣ ҳамчун дастоварди бузурги таърихии миллати тоҷик барои эҳёи давлатдории миллӣ, таҳкими пояҳои сиёсиву иқтисодӣ ва иҷтимоии кишвар ва рушди устувори ҷомеа заминаи мусоид фароҳам овард. Маҳз дар даврони соҳибистиқлолӣ бо таъмини сулҳу субот ва таҳкими ваҳдати миллӣ марҳилаи нави созандагӣ оғоз гардида, Тоҷикистон дар самти рушди соҳаҳои гуногун ба дастовардҳои назаррас ноил шуд ва дар арсаи байналмилалӣ мавқеи шоистаи худро таҳким бахшид
Дар идомаи ҳамоиш нақши Қувваҳои ҳарбӣ-ҳавоӣ ва мудофиаи зиддиҳавоӣ дар ҳифзи фазои ҳавоии кишвар, таъмини амнияти марзҳои фазоӣ ва таҳкими иқтидори мудофиавии давлат таъкид гардид. Зикр шуд, ки ҳимояи дастовардҳои истиқлолият ва таъмини амнияти кишвар аз ҳар як хизматчии ҳарбӣ масъулияти баланд, садоқат ба Ватан ва омодагии доимиро тақозо менамояд
Дар фазои тантанавӣ як қатор иштирокчиёни ҳамоиш барои саҳми арзанда дар иҷрои рисолати ватандорӣ, ҳифзи фазои ҳавоии Тоҷикистони соҳибистиқлол ва татбиқи нақша-чорабиниҳои ҷашнӣ бо медал ва ифтихорномаҳо сарфароз гардонида шуданд
Барномаи фарҳангии идона низ ба чорабинӣ ҳусни дигар бахшида, ҳунармандони ансамбли «Шараф»-и Вазорати мудофиаи Ҷумҳурии Тоҷикистон ва шуъбаи фарҳанги ноҳияи Рӯдакӣ бо суруду таронаҳои ватандӯстона ва барномаи рангини фарҳангӣ хотири иштирокчиёнро болида гардониданд
