Бо мақсади таҳлилу баррасӣ ва натиҷагирӣ аз вазъи кунунии ҷузъу томи Артиши миллӣ, тақвият бахшидани сатҳи тайёрии ҷангӣ, боз ҳам баланд бардоштани иқтидори мудофиавии кишвар ва дигар масъалаҳои марбут ба самтҳои фаъолияти соҳавӣ, бо иштироки ҳайатҳои роҳбарии Вазорати мудофиаи мамлакат, фармондеҳони навъҳои Қувваҳои Мусаллаҳ, комиссарони ҳарбии вилоятҳо ва командирони қисму воҳидҳои алоҳидаи низомӣ ҷаласа баргузор гардид.
Дар оғози ҷаласа чанде аз муовинони вазири мудофиа доир ба тақвият бахшидани сатҳи тайёрии ҷангии навъи қӯшунҳо, қисмҳои низомӣ, чорабиниҳои сафарбарӣ, ҳолати таъмини бехатарии хизмати ҳарбӣ, фаъолияти хадамоти қӯшунҳо, вазъи қонунияту тартиботи ҳуқуқӣ, интизоми ҳарбӣ, натиҷаи санҷишҳои инспексионӣ, рушди хоҷагиҳои ёрирасон, ҳолати санитарию гигиенӣ дар қисмҳои ҳарбӣ ва оид ба фаъолияти ҳамаҷонибаи Вазорати мудофиаи мамлакат ва бурду бохти ин ниҳоди қудратӣ дар назди ҳозирин маърӯза карданд.
Баъд аз муҳокимаи масъалаҳои ба миён гузошташуда, вазири мудофиаи мамлакат-Шералӣ Мирзо қайд кард, ки Президенти Ҷумҳурии Тоҷикистон муҳтарам Эмомалӣ Раҳмон баҳри баланд бардоштани қудрати дифоии кишвар ва дар ҳалли ҳама масоили амниятӣ, диққати аввалидараҷа зоҳир намуда, фаъолият ва бурду бохти сохторҳои низомии мамлакатро таҳти назорати доимӣ қарор додаанд. Аз ин рӯ таъкид карда шуд, ки ҳар як хизматчии ҳарбӣ бо иродаи қавӣ дар самти уҳдадориҳои соҳавӣ бояд содиқона рафтор кунад ва нисбат ба иҷрои талаботи вазифаҳои хизматӣ бо масъулияти баланд муносибат намояд.
Дар ин замина, супориш дода шуд, ки он ҳама вазифаҳое, ки Сарфармондеҳи Олии Қувваҳои Мусаллаҳ, генерали артиш, муҳтарам Эмомалӣ Раҳмон дар назди мо хизматчиёни ҳарбӣ зимни ироаи Паёми навбатӣ ва дар ҷашни Артиши миллӣ гузоштааст, диққати аввалиндараҷа равона карда, онро роҳнамои фаъолияти рӯзмарраи хеш қарор диҳанд ва иҷрои талаботи дастуру супоришҳоро дар мӯҳлатҳои муайянгардида таъмин намоянд.
Дар охири ҷаласа вазири мудофиаи мамлакат баҳри ислоҳ ва бартараф намудани камбудиҳои ҷойдошта дар фаъолияти хизматии ҷузъу том, ташкили хизмати дохилии қӯшунҳо, сифатан хуб ба роҳ мондани чорабиниҳои даъватии шаҳрвандон ба хизмати ҳарбӣ, тақвият бахшидани омодабошии ҷангӣ, корҳои сиёсӣ-тарбиявӣ, ташкили машғулиятҳои омодагии сафарбарӣ, тадбирҳои пешгирӣ аз бемориҳои сироятӣ, дар сатҳи баланд гусел намудани сарбозоне, ки хизмати ҳарбиро анҷом додаанд, қабулу ҷобаҷокунии наваскарон дар қисмҳои низомӣ, таъмини онҳо бо шароитҳои зарурӣ, баррасии саривақтии тамоми муроҷиатҳо вобаста ба қабули шаҳрвандон, самаранок истифода бурдани ҳар қитъа замини хоҷагиҳои ёрирасон ва вобаста ба дигар самтҳои фаъолияти соҳавӣ иштирокчиён ва масъулини дахлдори ин ниҳоди қудратиро бо супоришҳои мушаххас вазифадор намуд.
Фаридун МАҲМАДАЛИЗОДА,
сардори Маркази матуботи
Вазорати мудофиаи
Ҷумҳурии Тоҷикистон,
полковник
