Таҳти раисии вазири мудофиаи Ҷумҳурии Тоҷикистон генерал – полковник Эмомалӣ Собирзода маҷлиси мушоввараи Вазорати мудофиаи Ҷумҳурии Тоҷикистон «Оид ба натиҷаи фаъолияти комисариятҳои ҳарбӣ дар ҷамъбасти даъвати тирамоҳии соли 2025» — и шаҳрвандон ба сафи Артиши миллӣ баргузор шуд.
Нахуст сардори Ситоди генералии Қувваҳои Мусаллаҳ — муовини якуми вазири мудофиаи кишвар доир ба талаботи нақшаи пешбинишудаи даъвати тирамоҳӣ, татбиқи амалии чорабиниҳои дар ин самт муайянгардида, натиҷаҳои фаъолияти комиссариатҳои ҳарбӣ ва масъулини вобастаи ин маъракаи муҳими сиёсӣ гузориш дод.
Изҳор гардид, ки ҳамасола даъвати шаҳрвандон ба сафи Қувваҳои Мусаллаҳ таҳти таваҷҷӯҳи доимии Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ, генерали Артиш муҳтарам Эмомалӣ Раҳмон қарор дорад ва баҳри татбиқи босифати он аз тарафи Вазорати мудофиаи кишвар тадбирҳои мушаххас андешида мешавад.
Дар идомаи ҷамъомад инчунин вазъи қонунияту тартиботи ҳуқуқӣ, пешгирӣ аз сатҳи содиршавии ҷинояту қонуншиканӣ, сифати даъвати тирамоҳии шаҳрвандон ба хизмати ҳарбӣ, пешравию камбудиҳои ҷойдошта, тақвият бахшидани машғулиятҳои омодагии сафарбарӣ ва мудофиаи ҳудудӣ, ташкили машғулиятҳои пайвастаи соҳавӣ, ҷалби мутахассисони варзидаи низомӣ ва дигар масъалаҳои марбут ба соҳа таҳлилу баррасӣ шуд.
Вазори мудофиаи кишвар зимни баромади худ иброз намуд, ки сол то сол шумораи ихтиёриён ба сафи Қувваҳои Мусаллаҳи Ҷумҳурии Тоҷикистон афзоиш меёбад, ки ин аз дарки баланди масъулиятшиносӣ, ватандорӣ ва худогоҳии шаҳрвандони Тоҷикистони соҳибистиқлол шаҳодат медиҳад.
Ҳамин аст, ки Фармони Президенти Ҷумҳурии Тоҷикистон «Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007 Ҷумҳурии Тоҷикистон ба хизмати ҳарбӣ» тадбиқ шуда, нақшаи даъвати тирамоҳии шаҳрвандон ба хизмати ҳатмии ҳарбӣ саривақт ва босифат иҷро шуд.
Дар идома доир ба фаъолияти минбаъдаи комисариятҳои ҳарбӣ, густариш бахшидани ҳамкорӣ бо масъулини мақомотҳои иҷроияи ҳокимияти давлатии шаҳру ноҳияҳо, мақомотҳои дахлдори ҳифзи ҳуқуқ, баргузории вохуриву суҳбатҳои муфид бо аҳолӣ, баланд бардоштани ҳисси ватандӯстии ҷавонон, баргузории суҳбату вохуриҳои гуногун бо донишҷӯёну хонандагони муассисаҳои таҳсилоти миёнаи умумӣ ва масъалаҳои муҳими соҳа андешаронӣ карда шуд.
Ёдовар мешавем, ки маҷлиси мазкур ҳамасола баъди ҷамъбасти маъракаи даъвати шаҳрвандон ба хизмати ҳатмии ҳарбӣ баргузор мешавад.
Илҳом АЛИЗОДА,
сардори Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон,
капитан
