Ҷаласаи ҳамоҳангсозии сохторҳои қудратӣ ва мақомоти ҳифзи ҳуқуқи кишвар, ки дар Вазорати мудофиаи мамлакат доир гардид, зимни он вобаста ба дастуру супоришҳои Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон дар самти таҳкиму тақвият бахшидани қудрати дифоии мамлакат таъкид карда шуд, ки дар шароити рӯзафзуни ҷаҳонишавӣ, авҷ гирифтани ҳар гуна зуҳуроту хатарҳои глобалӣ ва вазъи ноорому пешгӯйинашавандаи ҷаҳони муосир, хизматчиёнии ҳарбии Қувваҳои Мусаллаҳ ва кормандони сохторҳои қудративу мақомоти ҳифзи ҳуқуқи мамлакатро зарур аст, ки дар иҷрои вазифаҳои касбиву хизматии хеш масъулияти баланд зоҳир намуда, чун ҳарвақта ҳушёру зирак бошанд ва бо ҳамкориву ҳамгироии муштарак дар таъмини амнияти давлату миллат, пойдории сулҳу субот ва ҳифзи марзу буми Ватан аз худ саҳми арзанда гузоранд.
Дар кори ҷаласа вобаста ба чорабиниҳои даъвати шаҳрвандон ба хизмати ҳарбӣ дар давраҳои пешбинигардидаи соли 2025-ум масъулини Ситоди генералии Қувваҳои Мусаллаҳ зикр карданд, ки мақомоти давлатии даъват ва дигар ниҳодҳои вобастаи ин чорабинии муҳими сиёсӣ-ҷамъиятиро зарур аст, ки фаъолияти хеш ва кори комиссияҳои даъватиро дар асоси талаботи дастуру супоришҳои Роҳбарияти Олии мамлакат ва қонунҳои амалкунандаи соҳа ба роҳ монда, ҷиҳати боз ҳам беҳтар ва сифатан хуб ба роҳ мондани чорабиниҳои даъватӣ муносибати ҷиддӣ зоҳир намоянд.
Зимни баррасии масъалаҳо дар самти ҷамъомадҳои мудофиаи ҳудудӣ ва омодагии захираҳои сафарбарӣ бошад, ҳамоҳангии сохторҳои марбута дар таъмин ва омўзиши ҳаматарафаи захираҳои сафарбарӣ муҳиму зарурӣ арзёбӣ гардид.
Ҳамин тавр, дар охир иштирокчиёни ҷаласа вобаста ба масъалаҳои баррасигарда, ҷиҳати дар сатҳи баланд ташкилу гузаронидани ҷамъомаду чорабиниҳои ба нақша гирифташуда дар давраи соли 2025 ва амалинамоии нақшаи ягонаи омодагии ҷангӣ дар Қувваҳои Мусаллаҳи мамлакат бо супоришҳои мушаххас вазифадор гардиданд.
Боқӣ ШАРИФӢ,
подполковник
