Масъулини Сарпрокуратураи ҳарбӣ ва прокуратураҳои ҳарбии гарнизонҳои ҷумҳурӣ дар доираи нақша-чорабиниҳои кории хеш пайваста бо ҷалби хизматчиёни ҳарбии сатҳу зинаҳои гуногуни Артиши миллӣ ва дигар сохторҳои низомии кишвар чорабиниву машваратҳои гуногуни корӣ доир менамоянд.
Бо мақсади пешгирии сатҳи содиршавии ҷинояту ҷинояткорӣ, такмили ҷаҳонбинии сиёсӣ ва маърифати ҳуқуқии афсарону сарбозон, чанде қабл намояндагони Сарпрокуратураи ҳарбии ҷумҳурӣ бо ҳайати шахсии Маркази таълимии “Пойтахт”-и Қӯшунҳои сарҳадии Кумитаи давлатии амнияти миллии Ҷумҳурии Тоҷикистон сӯҳбату вохӯрии судманд доир намуданд.
Зимни баромади худ дар назди афсарону сарбозони сарҳадбони Ватан намояндагони мақомоти прокурорӣ таъкид карданд, ки хизмати рӯзмарраи хешро бо риояи дақиқи қонунгузориҳо дар соҳаи хизмати ҳарбӣ ва оинномаҳои Қувваҳои Мусаллаҳ пеш бурда, бо интизоми намунавии хизматӣ ва эҳсоси волои ватандӯстона садоқати ҷавонмардонаи худро дар назди халқу Ватан собит намоянд ва ҳамчун сарбози далери марзи муқаддаси диёр мардуми шарифи Тоҷикистонро бовар кунонанд, ки онҳо бо донишу маҳорати баланди касбии хеш баҳри таъмини амнияту суботи комил дар сарзамини аҷдодӣ доимо омодаанд.
Ҳамчунин, дар доираи нақша-чорабиниҳои пешбинигардида чанде қабл дар Прокуратураи ҳарбии гарнизони Душанбе бо иштироки намояндагони сохторҳои низомӣ, комиссарони ҳарбӣ ва командирони қисмҳои низомии ин гарнизон ҷиҳати таҳкими интизоми ҳарбӣ ва таъмини волоияти қонун ҷаласаи шӯрои ҳамоҳангсозӣ доир гардид.
Дар рафти ҷаласа зикр карда шуд, ки кормандони прокуратураи ҳарбии гарнизон баҳри таъмини ҳукуқу манфиатҳои хизматчиёни ҳарбӣ, пешгирӣ намудани содиршавии ҷиноят ва таҳкими қонуният пайваста дар қисму воҳидҳои низомӣ ва бо ҷалби хизматчиёни ҳарбии сатҳу зинаҳои гуногуни Артиши миллӣ корҳои фаҳмондадиҳиро амалӣ менамоянд.
Илова бар ин, таъкид карда шуд, ки вобаста ба риояи ҳатмии оинномаҳои ҳарбӣ, муносибатҳои боэҳтиромонаи байниҳамдигарии ҳайати шахсӣ, рафоқату дӯстии сарбозон ва дар маҷмӯъ баланд бардоштани маърифати ҳуқуқии хизматчиёни ҳарбӣ таваҷҷӯҳи ҳамаҷониба зоҳир карда шавад.
Боқӣ ШАРИФОВ
