Коррупсия яке аз масъалаҳои муҳими рӯзмарра дар ҷомеаи муосир ба шумор меравад, ки рушди устувори давлатҳоро халалдор месозад ва ба пояҳои давлатдорӣ таъсири манфӣ мерасонад.
Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон пайваста таъкид менамоянд, ки мубориза бо коррупсия бояд яке аз самтҳои афзалиятноки сиёсати давлатӣ бошад. Дар ин росто, таъмини шаффофият, тақвияти ҳисси масъулият дар сохторҳои давлатӣ, аз ҷумла Қувваҳои Мусаллаҳ аҳамияти бузург дорад.
Тибқи нақшаи муштараки тасдиқгардида дар Вазорати мудофиаи Ҷумҳурии Тоҷикистон ҳамоиш таҳти унвони “Муқовимат бо коррупсия дар низоми Қувваҳои Мусаллаҳи Ҷумҳурии Тоҷикистон: мушкилоти ҷойдошта ва чораҳои пешгирии он” баргузор гардид.
Дар ҳамоиш намояндагони Агентии назорати давлатии молиявӣ ва мубориза бо коррупсияи Ҷумҳурии Тоҷикистон, ҳайати шахсии Дастгоҳи марказии Вазорати мудофиа, Ситоди генералии Қувваҳои Мусаллаҳ, масъулини сохторҳои ҳарбӣ ва дигар шахсони расмӣ иштирок намуданд.
Ҳамоиш бо ҳадафи баланд бардоштани сатҳи огоҳии ҳуқуқии ҳайати шахсии Қувваҳои Мусаллаҳ ва таъмини амнияти иқтисодии кишвар баргузор гардид.
Иштирокчиён масъалаҳои мубрами марбут ба ҳолатҳои коррупсиониро мавриди баррасӣ қарор дода, таъкид намуданд, ки муқовимат бо коррупсия ин арљгузорӣ ба низоми устувори давлатдорӣ, дастовардҳои Истиқлолият ва дар ин замина таъмини зиндагии шоистаи мардум ба ҳисоб меравад.
Раванди мунтазами омӯзиш ва баланд бардоштани маърифати ҳуқуқии аҳолӣ, рақамисозии раванди идоракунии захираҳои молиявӣ ва моддӣ дар сохтору ниҳодҳои давлатӣ, рушди ҳамкории байнисохторӣ байни мақомоти зиддикоррупсионӣ ва ниҳодҳои давлативу қудратӣ, омилҳои муҳими пешгирӣ ва мубориза бо ин зуҳурот маҳсуб мешавад.
Зикр гардид, ки мубориза бо коррупсия танҳо бо саъю кӯшиши як ниҳод ғайриимкон аст. Он бояд ҷанбаи умумиҷамъиятӣ ва бисёрсамта дошта бошад. Ҳамаи сохторҳо, хусусан хизматчиёни ҳарбии Қувваҳои Мусаллаҳ, бояд дар ин ҷода масъулиятшинос бошанд ва барои ҳифзи арзишҳои миллӣ ва амнияти давлатӣ саҳм гузоранд.
Илҳом АЛИЗОДА,
сардори Маркази матбуот ва иттилооти
Вазорати мудофиаи Ҷумҳурии Тоҷикистон,
капитан
