“Вазъи мураккабу ташвишовари минтақа ва ҷаҳон, аз ҷумла торафт шиддат гирифтани раванди азнавтақсимкунии дунё, яроқнокшавии бошитоб, «ҷанги сард», таҳдиду хатарҳои муосир–терроризму экстремизм, қочоқи силоҳ, ҷиноятҳои киберӣ ва дигар ҷинояткориҳои муташаккили фаромиллӣ моро водор месозад, ки барои таъмин намудани амнияти мудофиавии кишварамон тадбирҳои иловагӣ андешем. Бо беҳтарин шароити зиндагиву хизмат таъмин намудани хизматчиёни ҳарбии Қувваҳои Мусаллаҳ, омода кардани кадрҳои баландихтисос, такмил додани дониши тахассусӣ ва сатҳи касбияти ҳайати шахсии ҷузъу томҳо, боз ҳам баланд бардоштани ҳисси масъулиятшиносӣ ва ватандӯстиву ватанпарастии афсарону сарбозон аз қабили ин тадбирҳо мебошанд”. Ин порчаест, аз ироаи Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон.
Ҳамасола дар доираи ироаи Паём ва иқдому ташаббусҳои созандаву бунёдкоронаи Сарфармондеҳи Олии Қувваҳои Мусаллаҳ, муҳтарам Эмомалӣ Раҳмон дар самти муҳайё намудани шароитҳои хуби таълимӣ ва ҳам хизмативу майишӣ ва ғамхориҳои доимии Пешвои миллат ба ҳар як афсару сарбоз боис мегардад, ки қисмҳои низомӣ дар доираи меъёри муқарраргардида ва талаботи ҳозиразамони ҳарбӣ бунёду азнавсозӣ шуда, иқтидори мудофиавии мамлакат боз ҳам афзун гардад.
Дар даврони Истиқлолияти давлатии Ҷумҳурии Тоҷикистон ва дар доираи сиёсати пешгирифтаи иқтисодии роҳбарияти давлату ҳукумати ҷумҳурӣ дар самти созандагиву бунёдкориҳо ва анҷоми корҳои сохтмонӣ, барои пешбурди хизмати рӯзмарраи низомиён ва майишату фароғати онҳо, дар давоми ин солҳо як қатор бинову иншооти аҳамияти ҳарбӣ дошта мавриди баҳрабардорӣ қарор гирифтанд.
Дар ин замина тавре, ки Президенти Ҷумҳурии Тоҷикистон, муҳтарам Эмомалӣ Раҳмон дар Паёми навбатиашон ба маҷлиси Олии Ҷумҳурии Тоҷикистон зикр намуданд:
“Ҳукумати мамлакат дар доир ба навсозии иқтидори Қувваҳои Мусаллаҳ ҳамаи чораҳои заруриро андешида истодааст ва ин равандро минбаъд низ идома хоҳад дод. Ҳадафи мо аз навсозии имкониятҳои Қувваҳои Мусаллаҳ боз ҳам беҳтар таъмин намудани амният ва суботи кишварамон мебошад”.
Воқеан, Ҳукумати Тоҷикистон новобаста аз таъсири манфии омилҳои берунӣ ба иқтисоди миллӣ бо дарназардошти вазъи ҷаҳони муосир ва бо мақсади мустаҳкам намудани заминаҳои моддиву техникӣ, аз ҳамаи захираву имкониятҳои мавҷуда истифода менамояд. Зеро, масъалаи таъмини амнияти милливу давлатӣ имрӯз нисбат ба ҳар вақти дигар аҳамияти мубраму муҳим пайдо кардааст.
Дар ин раванд солҳои охир барномаи азнавсозии Қувваҳои Мусаллаҳи Тоҷикистон марҳала ба марҳала амалӣ гардида истодааст, ки мақсад аз он таъмини ҷузъу томҳои Қувваҳои Мусаллаҳ бо аслиҳа ва воситаҳои техникии муосири ҳарбӣ ва боз ҳам беҳтар гардонидани шароити рӯзмарраи хизматӣ барои муҳофизони Ватан мебошад.
Дар робита ба пурзӯр намудани Артиш, боз ҳам баланд бардоштани омодагии ҷангии он ҳамзамон тақвият бахшидани қудрати мудофиавии давлат аз вазифаҳоест, ки доимо дар маркази диққати Сарфармондеҳи Олии Қувваҳои Мусаллаҳ, муҳтарам Эмомалӣ Раҳмон қарор дошта, баҳри татбиқи амалии ин ҳадафҳо ҳайатҳои роҳбариву фармондеҳии Артиши миллӣ, зимни ҷамбасту натиҷагирӣ аз бурду бохт ва фаъолият Вазорати мудофиа дар соли 2023-юм, шиореро, таҳти унвони “Таъмини амнияти миллату давлат ва ҳифзи марзу буми Ватан рисолати касбии мост” қабул намуданд ва дар ин радиф аз генерал то сарбози қаторӣ азм доранд, ки давоми соли равон тибқи нақша-чорабиниҳои тарҳрезигардида дар самтҳои болозикр корҳои зиёдеро ба сомон расонанд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
