Ҷамъомади тантанавӣ ба муносибати таҷлил аз 30-юмин солгарди қабули Конститутсияи Ҷумҳурии Тоҷикистон дар Вазорати мудофиа тибқи қавоиди доимии низомиён бо ворид намудани Парчами давлатӣ, Байрақи ҷангӣ ва баъд аз садо додани Суруди миллӣ оғоз гардид.
Дар ҷамъомади тантанавӣ ҳайатҳои роҳбариву фармондеҳии Вазорати мудофиа, намоянда аз Суди конститутсионии Ҷумҳурии Тоҷикистон, хизматчиёни ҳарбии Дастгоҳи марказии ин ниҳоди қудратӣ ва Ситоди генералии Қувваҳои Мусаллаҳи мамлакат иштирок намуданд.
Роҳбарияти Вазорати мудофиа ва намояндаи Суди конститутсионӣ зимни баромади пурмӯҳтавои хеш зикр карданд, ки раванди таҳияи Конститутсияи нав пас аз баргузории иҷлосияи 16-уми таърихии Шӯрои Олии Ҷумҳурии Тоҷикистон бо ташаббус ва роҳбарии бевоситаи Сарвари давлат муҳтарам Эмомалӣ Раҳмон оғоз гардид, ки он ҳамчун ҳуҷҷати сарнавиштсоз роҳи пешрафти ояндаи халку давлатро дар тӯли даҳсолаҳо муайян кард.
Дар ин радиф қайд карда шуд, ки дар Конститутсияи Ҷумҳурии Тоҷикистон шакли идоракунии давлат, ҳуқуқу озодиҳои инсон ва шаҳрванд, муқаддасоти миллӣ, мавқеи мақомоти ҳокимияти давлатӣ, муҳимтарин самтҳои рушди ҷомеа, мавқеи забон дар инкишофи фарҳанги миллӣ ва дигар самтҳои ҳаётан муҳими ҷомеа хеле равшан инъикос ёфтааст.
Бо ёдовари аз рӯзу лаҳзаҳои солҳои аввали Истиқлоли миллӣ қайд карда шуд, ки барои барқарорсозии сохти конститутсионӣ дар кишвар афсарону сарбозони тоҷик ҷоннисорӣ намуда, барои таҳким ва пойдории сулҳ дар ҷумҳурӣ саҳми арзанда гузоштанд. Илова бар ин, зикр гардид, ки тартиби фаъолият, танзими хизмати ҳарбӣ дар Қувваҳои Мусаллаҳ низ мувофиқ ба талабот ва дар асоси Конститутсияи Ҷумҳурии Тоҷикистон ба роҳ монда шудааст. Аз ин рӯ изҳор карда шуд, ки мо хизматчиёни ҳарбии Қувваҳои Мусаллаҳ ин вазифаи муқаддаси худро минбаъд низ бо ҳисси ифтихор ва масъулияти баланд аз Ватану ватандорӣ адо хоҳем кард.
Дар охир иштирокчиёни чорабинӣ қабули Кониститутсияро як санаи бисёр муқаддас, пурифтихор ва сарнавиштсоз дар таърихи давлатдории навини тоҷикон ва яке аз саҳифаҳои дурахшони таърихи даврони Истиқлоли миллӣ арзёбӣ намуда, ҳама хизматчиёни ҳарбии ин ниҳоди қудратӣ ва дар симои онҳо тамоми муҳофизони ин марзу буми аҷдодиро бо ин санаи муҳим табрику таҳният карданд.
Маврид ба зикр аст, ки ба муносибати таҷлил аз 30-юмин солгарди Кониститутсия Ҷумҳурии Тоҷикистон дар тамоми ҷузъу томи навъи қӯшуни Қувваҳои Мусаллаҳ, қисму воҳидҳои алоҳидаи низомӣ, муассисаҳои таълимии ҳарбӣ ва умуман дар пойгоҳи дигар сохтору идораҳои зертобеи Вазорати мудофиаи ҷумҳурӣ низ конфронсҳои илмӣ-амалӣ, мизҳои мудаввар, чорабиниҳои гуногуни сиёсиву фарҳангӣ ва варзишӣ ташкилу ба роҳ монда шуданд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
