16 уми ноябр ба муносибати Рўзи Президенти Ҷумҳурии Тоҷикистон дар толори Вазорати мудофиаи мамлакат ҷамъомади тантанавӣ баргузор гардид.
Дар ҷамъомад роҳбарияти ин ниҳоди қудратӣ, намояндагони Маркази татқиқоти стратегии назди Президенти Ҷумҳурии Тоҷикистон ва Донишгоҳи миллии Тоҷикистон дар назди хизматчиёни ҳарбии сатҳу зинаҳои гуногун суханронӣ намуда, доир ба аҳамияти ин санаи бисёр муҳими таърихӣ, ки он боиси амалӣ гардидани орзую омоли неки мардум, кафили сулҳу оромӣ, меҳру муҳаббат, адолату шафқат,
хираду пешрафт ва ваҳдату ҳамдилии ҷомеа гардидааст, изҳори андеша намуданд.
Дар ҷараёни ҷамъомад зикр карда шуд, ки Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, аз рўзҳои нахустини фаъолияти худ, ба ҳайси сарвари давлат дар баробари анҷоми хизматҳои беназир, чун Сарфармондеҳи Олии Қувваҳои Мусаллаҳ дар давоми ин солҳо барои рушду такомул ёфтани Артиши миллӣ, таваҷҷуҳи хосса зоҳир намуда, онро ба як нерӯйи пуриқтидор, таъминкунандаи амнияти давлату миллат табдил доданд.
Бо ёдоварӣ аз таъриху тамаддуни давлатдории баъзе аз кишварҳои қудратманди минтақа ва ҷаҳон, қайд карда шуд, ки ҳар як миллат барои ноил гардидан ба Истиқлоли комил, пешрафту тараққиёт ва иттиҳоду сарҷамъии давлату халқият, аз нерӯву тавоноии шахсиятҳои таърихиву барҷаста, ки дар марҳалаҳои бисёр мураккабу ҳассос барои кишварашон, онҳо ба арсаи сиёсат омада, суботу осоиштагӣ ва роҳи рушди минбаъдаи мамлакати худро муайян намудаанд, истифода менамоянд ва чунин шахсиятҳо дар болоравии обрӯву мақоми давлатдориашон нақши муҳим мебозанд.
Дар ин радиф дар симои Пешвои миллат, муҳтарам Эмомалӣ Раҳмон зикр гардид, ки дар баробари ба даст овардани Истиқлоли давлатӣ, мардуми хуштолеъи Тоҷикистони азизро роҳбари раиятпарвару ватандӯсте насиб гардонид, ки бо такя ба хиради халқи сулҳпарвару соҳибтамаддунаш ва кирдору амалҳои некаш, 
тавонист ба муноқишаҳои дохилӣ хотима бахшад, мардуми парешонгаштаро муттаҳид намояд, сулҳу ваҳдатро пойдор нигаҳ дорад, тамоми рукнҳои давлатдориро барқарор сохта, беҳдоши вазъи сиёсӣ, иҷтимоиву иқтисодӣ дар кишвар, худшиносиву худогоҳӣ, ҳисси ватандӯстиву ватанпарварии тамоми табақаҳои ҷомеаро боз ҳам таҳкиму тақвият бахшад.
Дар охири ҷамъомади тантанвӣ, бо изҳори сипосу миннатдорӣ ва эътимоду боварӣ таъкид карда шуд, ки мо хизматчиёни ҳарбии Қувваҳои Мусаллаҳ бо Пешвои миллати худ муҳтарам Эмомалӣ Раҳмон ифтихор менамоем ва ҳамеша ба савганди ёдкардаи хеш содиқ монда, вазифаи муқаддаси худро минбаъд низ бо ҳисси ифтихор ва масъулияти баланд аз Ватану ватандорӣ дар назди ҳалқу миллат ва сарвари ғамхори худ адо менамоем.
Фаридун МАҲМАДАЛИЗОДА,
сардори Маркази матбуот,
полковник
