Тақвият бахшидани донишу малакаи касбии низомиён, такмили маҳорати соҳавӣ ва сайқал додани таҷрибаи пешқадам дар самти пешбурди хизмати шабонарӯзии ҳайати шахсӣ ин ҷорӣ намудани роҳу усулҳои наву муосири омӯзишӣ дар фаъолияти рӯзмарраи ҷузъу том маҳсуб меёбад. Аз ин хотир, ҳамасола вобаста ба давраҳои якум ва дуюми омӯзишӣ дар Қуваҳои Мусаллаҳ, бо ҷалби ҳайатҳои роҳбариву фармондеҳии Вазорати мудофиа, навъи қӯшунҳо ва командирони сатҳу зинаҳои гуногуни Артиши миллӣ ҷамъомаду машғулиятҳои мухталифи назариявӣ ва амалии саҳроӣ ташкилу ба роҳ монда мешаванд.
Бо ҳамин тартиб, ҷамъомади методӣ-таълимӣ бо ҷалби ҳайатҳои роҳбариву фармондеҳии ин ниҳоди қудратӣ давоми 2 рӯз дар пойгоҳи Қувваҳои ҳарбӣ ҳавоӣ ва мудофиаи зидди ҳавоии Қувваҳои Мусаллаҳ ва машқгоҳи “Фахробод”-и вилояти Хатлон ташкилу ба роҳ монда шуд.
Ҳадаф аз баргузории ҷамъомади методӣ-таълимӣ ин пеш аз ҳама дар амал нишон додани роҳу усулҳои нави омӯзишӣ дар Қувваҳои Мусаллаҳ, таҷрибаомӯзӣ аз ҳамдигар ва баланд бардоштани масъулият ва сайқали донишу малакаи иштирокчиёни онро дар бар мегирифт. Яъне мароми асосӣ ин ташаккул додани назару муносибати ягона ба масоили омодагии ҷангӣ, ташкили хидмати дохилии қӯшунҳо, мувофиқ намудани ҳудуди тамоми шаҳракҳои ҳарбӣ, толору майдончаҳои варзишӣ ва дигар мавзеъу нуқтаҳои таълимии афсарону сарбозон ба талаботи оинномаҳои ҳарбии Қувваҳои Мусаллаҳ мебошад.
Рӯзи дуюми машғулиятҳои методӣ-таълимӣ дар машқгоҳи ҳарбии “Фахробод”-и вилояти Хатлон идома ёфт. Дар чунин ҷамъомадҳои таълимӣ вобаста ба мавзӯъҳои муҳими соҳавӣ ҳар дафъа талаботи нав ва навовариҳои зиёде ворид карда мешавад. Зеро авзои пуртазоди ҷомеаи муосир, низомиёни ҳама зинаҳоро ба он водор менамояд, ки донишу малака, маҳорати касбӣ ва таҷрибаи соҳавии худро дар мубориза бар зидди ҳама гуна таҳдиду хатарҳо мутобиқ намоянд.
Аз ин рӯ дар чунин ҷамъомаду машғулиятҳои назариявию амалии саҳроӣ роҳу усулҳои омодагии сафарбарӣ ва марҳилаҳои тайёрӣ ба он, тарзи идора намудани ҷузъу том дар маҳалли амалиёт, мутобиқ намудани вазъи рӯҳӣ-равонии ҷанговарон ҳангоми набард, омӯзишу аз бар намудани мавзеву минтақаи ҷуғрофӣ, тартиби бурдани хизмати қаровулӣ, ҷобаҷогузории наряди шабонарӯзӣ, роҳандозӣ намудани тадбирҳои муҳим дар самти ҳимояи шаҳрчаҳои ҳарбӣ ва дигар мавзуоти марбут, ки ба сатҳи омодагии ҳамаҷонибаи низомиён мусоидат мекунад, мавриди омӯзиш қарор мегиранд.
Бояд тазаккур дод, ки чунин ҷамъомад ё худ машғулиятҳои методӣ-таълимӣ вобаста ба давраҳои омӯзишӣ дар Қувваҳои Мусаллаҳ дар як сол ду маротиба гузаронида мешаванд. Барои гузаронидани чунин машғулиятҳои намунавии методӣ-таълимӣ ҳар як фармондеҳи навъи қӯшун, командирони қисмҳои низомӣ ва афсарону сарбозони вобастаи ҷузъу том, бо кӯмаку дастгирии роҳбарият ва хадамоти дахлдори Вазорати мудофиа тамоми кӯшишу ғайрати хешро ба он равона мекунанд, то дар муддати як моҳе, ки барои тайёрӣ ба даври навбатии омӯзишӣ пешбинӣ мешавад, тамоми шароитҳои зарурии таълимӣ муҳайё гардад.
Ҳамин тариқ, қабл аз натиҷагирӣ намудани ҷамъомади 2-рӯзаи методӣ-таълимӣ иштирокчиёни он аз фанҳои гуногуни ҳарбиву ҷисмонӣ, тарзи идора намудани ҷузъу том, воҳидҳои ҳарбӣ, омодабошии ҷангӣ ва оид ба дигар мавзӯҳои соҳавӣ дар назди афсарони масъули Вазорати мудофиа ва Ситоди генералии Қувваҳои Мусаллаҳ санҷиш супурданд.
Дар охири ҷамъомад ва зимни натиҷагирӣ аз машғулиятҳои методӣ-таълимӣ, муовинони вазири мудофиа доир ба дастуру супоришҳо ва ғамхориҳои пайвастаи Пешвои миллат, Сарфармондеҳи Олии Қувваҳои Мусаллаҳ, мӯҳтарам Эмомалӣ Раҳмон нисбат ба низомиёни кишвар сухан гуфта, баҳри боз ҳам баланд бардоштани сатҳи омодабошии ҷангӣ, иҷрои саривақтии ҳама вазифаву ӯҳдадориҳои хизматӣ, таъмини тартиботи ҳуқуқӣ, интизоми ҳарбӣ, волоияти қонун, ривоҷ бахшидани соҳаи ақибгоҳӣ, бунёди заминаҳои хуби моддӣ-таълимӣ, фароҳам овардани шароитҳои хуби маишиву таълимӣ ва самаранок истифода намудани соатҳои дарсӣ иштирокчиёни ҷамъомадро бо супоришҳои мушаххас вазифадор намуданд.
Фаридун МАҲМАДАЛИЗОДА,
полковник
