Дар доираи нақша-чорабиниҳои тайёрии ҷангӣ ва вобаста ба татбиқи амалии Стратегияи миллии муқовимат бо экстремизм ва терроризм дар Ҷумҳурии Тоҷикистон барои солҳои 2021-2025, чанде қабл дар машқгоҳи таълимии кӯҳии “Мағоб”-и дараи Ромити шаҳри Ваҳдат машқҳои ротавӣ-тактикӣ бо ҷалби афсарону сарбозони ҷузъу томи Бригадаи ҳамлаовари десантии Қӯшунҳои зудамали Қувваҳои Мусаллаҳи мамлакат ва гурӯҳи чорабиниҳои махсуси Қӯшунҳои дохилии Вазорати корҳои дохилӣ ташкилу ба роҳ монда шуд. Зимни машқҳои навбатӣ ҷузъу томи ҷалбгардида ба он, вобаста ба ҳадаву вазифаҳои дар наздашон буда, ки асосан идора намудани амалиётҳои мусаллаҳона дар минтақаҳои мухталифи кӯҳӣ ва дараву мавзеъҳои касногузарро дар бар мегирад амал намуда, тибқи матлаби пешбинигардида гӯё бо муайян намудани мавқеи паноҳбурдаи душманони шартӣ дар минтақаҳои кӯҳӣ ва маҳалли аҳолинишин ба амалиёти тактикӣ шурӯъ намуданд.
Ҳамин тавр, десантчиён бо силоҳу муҳиммоти хоси худ ва дигар қувваву воситаҳои истфодаашон мусоид дар шароити кӯҳистон вазифаҳои касбии бар ӯҳдадоштаро муваффақона иҷро карданд. Гурӯҳи чорабиниҳои махсуси Қӯшунҳои дохилӣ бошанд, дар рафти тамринҳои мазкур омодабошии хешро дар самти озод намудани маҳалли аҳолинишин ва безараргардонии иншооттҳои ғасбгардида, ки иҷрои он яке аз самтҳои фаъолияти ин навъи қӯшунро дар бар мегирад, нишон доданд.
Албатта, ташкили ин гуна машқҳои тактикӣ имкон медиҳад, ки хизматчиёни ҳарбии навъҳои қӯшуни Артиши миллӣ фаъолияти ягонаи кории худ ва мукаммалгардонии сохтори идоракунии муштаракро дар ҳамоҳангӣ тарҳрезӣ намоянд. Ҳамзамон, ин гуна машқҳои якҷояи ҳарбӣ воситаест, ки афсарону аскарони ҷалбгардида бо ҳамдигар табодули донишу таҷриба намуда, баҳри якпорчагии Тоҷикистони соҳибистиқлол ва суботу оромии минтақа омодагӣ мегиранд.
Бояд гуфт, ки сарбозони Бригадаи ҳамлаовари десантии Қӯшунҳои зудамали Қувваҳои Мусаллаҳ ҳамин гуна амалиётҳои тактикиро бо тафовути шаклу услулҳои гуногун пайваста доир намуда, на танҳо қобиляти ҷисмонии худро инкишоф медиҳанд, балки ҳунару маҳорати ҷангиашонро бо назардошти вазъи феълии минтақа ва ҷаҳон тақвият мебахшанд.
Маҳз, самараи донишу малакаи баланди касбӣ, таҷриба ва тактикаи ҷангии хизматчиёни ҳарбии Қувваҳои Мусаллаҳ мебошад, ки зимни машқҳо бо амалӣ намудани унсурҳои мухталифи зиддитеррористӣ дар шароити кӯҳистон, гӯё дар натиҷа гурӯҳи ғайриқонунии силоҳбадастон ё худ душманони шартӣ дастгиру безарар гардонида шуданд.
Зимни ҷамъбаст аз ҷониби ҳайати фармондеҳӣ ба афсарону сарбозони фаъоли дар ин машқҳо ширкатнамуда, сипосномаву ифтихорнома ва дигар туҳфаҳои хотиравӣ тақдим карда шуд.
Боқӣ ШАРИФОВ
