Афсарони сохтори идории Вазорати мудофиа, ҷузъу томи зертобеи он ва навъҳои қӯшуни Қувваҳои Мусаллаҳи мамлакат зимни ҷамъбасти ҳар як давраи омӯзишӣ ба машғулияту ҷамъомадҳои методӣ-таълимӣ ҷалб карда мешаванд. Чунин як ҷамъомад бо иштироки сардорони ситоду муовинони онҳо, афсарон оид ба сафарбарии ҷузъу том, намояндагони хадамоти қӯшун ва бехатарии хизмати ҳарбии қисму воҳидҳои низомии Вазорати мудофиа дар пойгоҳи Донишкадаи ҳарбии ин ниҳоди қудратии кишвар доир гардид.
Зимни иштирок дар ин гуна ҷамъомадҳо афсарони соҳа вобаста ба рушди илми ҳарбӣ, навгониҳои соҳаи низомӣ дар замони муосир, навовариҳо дар фаъолияти корӣ ва пеш аз ҳама авзои ҳарбӣ-сиёсии минтақаву ҷаҳонро бо ҳам мавриди таҳлилу омӯзиш қарор медиҳанд. Муҳтаво ва ҳадафи асосии ҷамъомади методӣ-таълимии навбатӣ низ аз ҳамин гуна мавзӯву машғулиятҳо иборат буд.
Қобили қайд аст, ки афсарони масъули ситод дар замони осоишта ва ҳолати ҷанг вазифаҳои муҳим ва ҳам масъулиятноки низомиро бар уҳда доранд. Аз ин ҷост, ки донишу малакаи касбии худро пайваста дар самти ташкил ва дар сатҳи зарурӣ идоракардани ҷузъу том, омодагии ҷангиву сафарбарии қӯшунҳо, ташкили хизмати қаровуливу тартиботи дохилӣ, риояи интизоми ҳарбӣ ва ахлоқию рӯҳияи ҳайати шахсӣ ва иҷрои бомуваффақияти вазифаҳои дар наздашон буда, такмилу тақвият мебахшанд.
Бо ин мақсад, дар ҷамъомади навбатӣ низ мавзӯи машғулиятҳои афсарони масъули вобастаи ситод, ки дар ҳайати гурӯҳҳо дар синфхонаву нуқтаҳои муҷаҳҳази таълимӣ ба омӯзишу баҳрабардории он фаро гирифта шуда буданд, асосан банақшагириву тайёрӣ ва идораи ҷузъу томро дар замони осоишта, ҳолатҳои дигари зарурӣ ва таҳдиди хатарҳои эҳтимолӣ дар бар мегирифт.
Ҳангоми натиҷагирӣ аз машғулиятҳои таълимӣ, ки бо иштироки сардори Ситоди генералии Қувваҳои Мусаллаҳ доир гардид, дар рафти он зикр карда шуд, ки мо бояд бо таҳлил ва хулосабардорӣ аз вазъи кунунии ҷаҳони муосир дар фаъолияти хизматии худ масъулияти баланди корӣ нишон дода, дар маҳалли хизмат назорати дурусти ҷобаҷогузориву нигоҳдории силоҳу техникаҳои ҳарбиро мувофиқи талаботи мавҷуда ба роҳ монем, ҳолати корӣ ва омодабошии доимии онҳоро назорат намуда, дар ин замина, вазифаи асосии худ, яъне хизмати содиқона баҳри ҳифзи марзу буми кишварро дар мадди аввал ва ҳадафи асосии худ қарор диҳем.
Б. ШАРИФОВ
